اندور،16؍ نومبر (ایس او نیوز؍آئی این ایس انڈیا) مدھیہ پردیش سمیت پانچ ریاستوں میں اسمبلی انتخابات کے پیش نظر بی جے پی نے جمعہ کو کہا کہ وہ ایودھیا میں بھگوان رام کے مندر کا آئینی طریقے سے تعمیر ضرور کرائے گی۔بی جے پی کے ترجمان سمبت پاترا نے کہاکہ ہم ایودھیا میں آئینی طریقے سے رام مندر کی تعمیر کے تئیں پابند عہد ہیں۔ایودھیا میں رام مندر ہم ضرور بنوائیں گے۔ایک سوال پر پاترا نے کہاکہ میں بطور بی جے پی ترجمان کوئی تبصرہ نہیں کر سکتا کہ اس موضوع (رام مندر کی تعمیر) میں پارلیمنٹ میں کوئی بل آئے گا یا نہیں۔پارلیمنٹ میں بل پیش کرنا ممبران پارلیمنٹ کے حقوق کا معاملہ ہے۔دریں اثنا پاترا کے ٹوئٹر ہینڈل پر 13 نومبر کو پوسٹ کمل ناتھ کی ایک ویڈیو کو لے کر کانگریس نے الیکشن کمیشن سے شکایت کی ہے۔بی جے پی ترجمان کا الزام ہے کہ اس ویڈیو میں ریاستی کانگریس صدر ایک فرقے کے خلاف بیان بازی کر رہے ہیں۔