نئی دہلی:23/مارچ(ایس او نیوز /آئی این ایس انڈیا)عام آدمی پارٹی (آپ)کے 21ممبران اسمبلی کی رکنیت پر منڈلا رہے خطرے کے بعد جمعرات کو اس فہرست میں پارٹی کے 11اور ممبران اسمبلی کے نام بھی جڑ گئے ہیں۔دہلی بی جے پی کے صدر منوج تیواری نے صدر پرنب مکھرجی کو خط لکھ کر آفس آف پرافٹ کے معاملے میں عام آدمی پارٹی کے 11ممبران اسمبلی کو نااہل قرار دینے کا مطالبہ کیا ہے۔بی جے پی نے جن 11اراکین اسمبلی کو نااہل قرار دینے کا مطالبہ کیا ہے اس میں سنجیو جھا (براڑی)، نتن تیاگی (لکشمی نگر)، پروین کمار (جنگ پورہ)، پون شرما (آدرش نگر)، شری دت شرما (گھونڈا)، راجیش گپتا (وزیرپور)، سریتا سنگھ (روہتاس نگر) دنیش موہنیا (سنگم وہار)، امانت اللہ خان (اوکھلا)، کیلاش گہلوت (نجف گڑھ)اور جرنیل سنگھ (تلک نگر)شامل ہیں۔منوج تیواری نے جمعرات کو یہاں پریس کانفرنس میں کہا کہ آپ کے 21ممبران اسمبلی کی رکنیت کو لے کر ہائی کورٹ میں چل رہا معاملہ دہلی حکومت ہار چکی ہے۔ایسے میں قومی دارالحکومت میں جلد ہی اسمبلی انتخابات ہونے کا امکان ہے۔انہوں نے کہا کہ دہلی حکومت نے 29/اپریل 2015کو اپنے 11ممبران اسمبلی کو ڈسٹرکٹ ڈیزاسٹر مینجمنٹ کمیٹی کا شریک چیئرمین بنایا تھا جوکہ فائدہ کے عہدے کے دائرے میں آتا ہے۔بی جے پی کے ریاستی صدر نے کہا کہ کیجریوال حکومت قانون کی دھجیاں اڑاتے ہوئے اقلیت میں ہے۔انہوں نے کہا کہ اقتدار کی لالچی آپ حکومت خود استعفی نہیں دے گی، اس لیے ہم نے صدر سے اس معاملے میں مداخلت کی اپیل کی ہے۔انہوں نے کہا کہ ایسے میں قومی دارالحکومت میں جلد انتخابات کا امکان ہے۔