بی جے پی کارپوریٹر نے دی تھی ،دیپک راؤ کے قتل کی سپاری! کمارسوامی کا دعویٰ
منگلورو8؍جنوری (ایس او نیوز)سابق وزیر اعلیٰ اورجنتا دل ایس کے قائد ایچ ڈی کمار سوامی نے میسور میں دھماکہ خیز انکشاف کرتے ہوئے اس بات کا دعویٰ کیا ہے کہ منگلورو میں دیپک راؤ کے قتل کے لئے ایک بی جے پی کارپوریٹر نے کرایے کے قاتلوں کو سپاری دی تھی۔
کمار سوامی نے الزام لگایا کہ ریاستی حکومت کو اس حقیقت کا علم ہے مگر نہ جانے کیوں وہ سچائی کو عوام کے سامنے نہیں لارہی ہے۔انہوں نے سوال کیا کہ کیااس معاملے میں بی جے پی اور کانگریس کے درمیان کوئی سمجھوتہ ہواہے؟کمار سوامی کا کہنا تھا کہ یہ باتیں وہ یوں ہی نہیں کہہ رہے ہیں بلکہ قتل کی تحقیقات کے سلسلے میں معلومات حاصل کرنے کے بعد ہی انہوں نے یہ سچائی بیان کی ہے۔ ان کے مطابققتل کے معاملے میں گرفتار ملزمین نے حقیقت سے آگاہ کرادیا ہے ، اس کے باوجود حکومت نے خاموشی اختیار کررکھی ہے۔
خیال رہے کہ دیپک رائو کا قتل 3 جنوری کو ہوا تھا، جس کے فوری بعد پولس نے قاتلوں کا پیچھا کرتے ہوئے چار لوگوں کو دھر دبوچاتھا۔ قتل کے بعد بی جے پی نے اس کی ہتھیا کے لئے جہادی طاقتوں کو ذمہ دارٹہرایا تھا، مگر کماراسوامی نے حیرت انگیز انکشاف کرتے ہوئے بی جے پی لیڈران کی جانب سے لگائے جانے والے الزامات پرزبردست حملہ کیا ہے۔
28 سالہ دیپک رائو کے قتل کے بعد پورے ضلع جنوبی کینرا میں حالات کشیدہ ہوگئے تھے اور اس کی موت کو لے کر سنگھ پریوار نے زبردست ہنگامہ برپا کیا تھا۔ سنگھ پریوار کے کارکنوں نے دیپک رائو کے قتل کا بدلہ لینے کے لئے اُسی رات ایک مسلم شخص عبدالبشیر پر بھی حملہ کرتے ہوئے انہیں زخمی کردیا تھا، جس کی سنیچر کو موت واقع ہوچکی ہے۔