انتقامی سیاست بی جے پی کا وطیرہ ہے کانگریس کا نہیں: رام لنگا ریڈی
بنگلورو،19؍ اگست(ایس او نیوز؍ عبدالحلیم منصور)ریاستی وزیر ٹرانسپورٹ رام لنگا ریڈی نے کہاکہ انتقام کی سیاست کرنا اور جمہوری نظام کے خلاف اپوزیشن پارٹیوں کا گلا گھونٹنا بی جے پی کا وطیرہ ہے کانگریس کا نہیں۔ کانگریس پارٹی انتقامی سیاست پر یقین نہیں رکھتی۔ آج بنگلور ایسٹ آر ٹی او دفتر کا افتتاح کرنے کے بعد خطاب کرتے ہوئے انہوں نے کہاکہ بی جے پی نے پچھلے 30,25 سال سے ملک کے عوام کو یہی کہہ کر گمراہ کیا ہے کہ وہ رام کی جائے پیدائش ایودھیا میں عالیشان رام مندر تعمیر کرے گی، اب جبکہ ملک پر مکمل اکثریت کے ساتھ بی جے پی اقتدار پر ہے اترپردیش میں بھی بی جے پی دو تہائی سے زیادہ اکثریت سے اقتدار پر ہے، لیکن رام مندر کے وعدہ کو اس نے فراموش کردیا ہے، اس سے ظاہر ہوتاہے کہ ملک کے عوام کے مذہبی جذبات کا استحصال کرکے بی جے پی نے اقتدار پر قبضہ کیا اور اپنے وعدے فراموش کردئے۔ اس موقع پر خطاب کرتے ہوئے مرکزی وزیر ڈی وی سدانند گوڈا نے کانگریس کو نشانہ بناتے ہوئے کہاکہ ریاست میں کانگریس حکومت یڈیورپا کے خلاف ڈی نوٹی فکیشن معاملہ اٹھاکر سیاسی انتقام لینا چاہتی ہے۔ انہوں نے کہاکہ کانگریس حکومت کا یہ رویہ سیاسی نفرت کو ہوا دیتا ہے۔ آنے والے انتخابات میں شکست کے خوف سے کانگریس اقتدار کا غلط استعمال کررہی ہے۔ اس موقع پر رکن اسمبلی بائرتی بسوراج ، ٹرانسپورٹ کمشنر دیانند اور دیگر افسران اور سیاست دان موجود تھے۔