رکن اسمبلی منی رتنا کے خلاف بی جے پی کی گورنر سے شکایت
بنگلورو،2؍جون(ایس او نیوز) برہت بنگلور مہانگر پالیکے میں خاتون کارپوریٹروں پر حملے اور بدسلوکی کے سلسلے میں شہر کے راجہ راجیشوری نگر کے رکن اسمبلی منی رتناکے خلاف کارروائی کرنے کیلئے ریاستی حکومت کو ضروری ہدایت دینے کی مانگ کرتے ہوئے آج بی جے پی کے ایک وفد نے گورنر واجو بھائی والا سے ملاقات کی۔ بی بی ایم پی کے اپوزیشن لیڈر پدمانابھا ریڈی کی قیادت میں رکن کونسل تارا ، پارٹی کی ترجمان مالویکا اویناش ، معاون ترجمان پرکاش ،اور کارپوریٹر نے گورنر واجو بھائی والا کو یہ شکایت کی کہ منی رتنا اور ان کے حامیوں کی طرف سے کارپوریٹروں کو مسلسل ہراساں کیاجارہاہے اس سلسلے میں انہوں نے گورنر کو منی رتنا کے حامیوں کی طرف سے کئے گئے حملوں کی تصاویر اور پولیس میں درج شکایات پر مشتمل دستاویزات پیش کئے ۔وفد نے گورنر سے کہا کہ وہ وزیر اعلیٰ سدرامیا ، وزیر داخلہ اور شہر کے پولیس کمشنر کو طلب کرکے مظلوم خاتون کارپوریٹروں کو مناسب تحفظ فراہم کرنا یقینی بنائیں۔ گورنر سے ملاقات کے بعد پدمانابھا ریڈی نے بتایاکہ حال ہی میں وزیر اعلیٰ سدرامیا کے پروگرام کے دوران ہی ایک خاتون کارپوریٹر منجولانارائن سوامی پر حملہ کی کوشش کی گئی ہے۔ منی رتنا اور ان کے حامیوں کی طرف سے یہ ہراسانیاں کی جارہی ہیں۔ یہ دعویٰ کرتے ہوئے کہ بنگلور سمیت ریاست بھر میں نظم وضبط کا نظام ٹوٹ چکا ہے، عام آدمی کو اس انتظامیہ کے تحت تحفظ حاصل نہیں ہے تو دوسری طرف منتخب نمائندوں کو بھی حکومت کی طرف سے تحفظ نہیں دیاجارہا ہے۔ ایسا ماحول بن گیا ہے کہ حکومت ہوتے ہوئے بھی نہ ہونے کے برابر ہے۔ انہوں نے کہا کہ راجہ راجیشوری نگر میں کسی بھی مسئلے پر منی رتنا اپنی تنقید برداشت نہیں کرتے۔اپنے غنڈوں کا استعمال کرکے خاتون کارپوریٹروں پر بھی حملے کروارہے ہیں۔ انہوں نے کہاکہ منی رتنا کے حامیوں کی طرف سے اس سے پہلے بھی اس طرح کی حرکتیں کی گئی ہیں۔