اسمبلی میں 150 سیٹیں حاصل کرنے بی جے پی کا خواب،3؍ اگست سے امیت شا کرناٹک میں قیام کریں گے
بنگلورو،19؍مئی(ایس او نیوز) ریاستی بی جے پی صدر بی ایس یڈیورپا نے کہاکہ آنے والے اسمبلی انتخابات میں بی جے پی کو 150 سے زائد سیٹوں پر کامیابی یقینی بنانے کیلئے بی جے پی کے قومی صدر امیت شا 3؍ اگست سے تین دن تک بنگلور میں مقیم رہیں گے اور اترپردیش کے طرز پر کرناٹک میں انتخابی مہم کی حکمت عملی وضع کرنے کے ساتھ تمام حلقوں کیلئے امیدواروں کے انتخاب کے عمل کو قطعیت د ی جائے گی۔ انہوں نے کہاکہ خشک سالی سے متاثرہ علاقوں کے 36روزہ دورے پر نکلی ہوئی بی جے پی ٹیمیں عوام سے ملاقات کرے گی اور انہیں درپیش مسائل کی جانکاری حاصل کرے گی۔ وزیراعلیٰ سدرامیا پر بے انتہا جھوٹ بولنے کا الزام لگاتے ہوئے انہوں نے کہاکہ کم از کم انتخابی سال میں سدرامیا کو جھوٹ کا سہارا لینا بند کردینا چاہئے۔ غیر ضروری طور پر وہ عوام میں انتشار پیدا کرنے کی کوشش نہ کریں۔ انہوں نے کہاکہ ریاست کے ترقیاتی کاموں کیلئے پچھلی بی جے پی حکومت نے جتنی رقم صرف کی ہے سدرامیا حکومت اتنا کرنے میں ناکام رہی ہے۔داونگیرے کے رکن پارلیمان اور سابق مرکزی وزیر جی ایم سدیشور کے گھرپر انکم ٹیکس کے چھاپے کا خیر مقدم کرتے ہوئے یڈیورپا نے کہاکہ اس سے ظاہر ہوتاہے کہ مرکزی حکومت سیاسی بنیادوں پر کسی سے امتیاز نہیں برت رہی ہے، اس موقع پر رکن پارلیمان شوبھاکارند لاجے ، سابق وزیر گووند کارجول اور دیگر موجود تھے۔