مینگلور 5/فروری (ایس او نیوز)  یہاں سے قریب مُلکی کے کوکّرکل پٹرول پمپ کے قریب  ایک تیز رفتار بس اور مخالف سمت سے آنے والی ایک بائک کو ٹکر مارتے ہوئے اُسے سو میٹر دور تک گھسیٹے ہوئے لے گئی، جس کے نتیجے میں  بائک سوار موقع پر ہی ہلاک ہوگیا ۔

ذرائع سے ملی  اطلاع کے مطابق  پیر شام آٹھ بجے مدھوسودھن  (61)  اپنے گھرسوکھانند نگر جارہا تھا کہ  مینگلور کی طرف جانے والی  ایک تیز رفتار بس اس کی اسکوٹر  سے ٹکراگئی۔ بتایا گیا ہے کہ بس کی زد میں آکر بس اسکوٹر کو سو میٹر دور تک کھینچتے ہوئے لے گئی، جس کے نتیجے میں مدھوسودھن کو بہت زیادہ چوٹیں آئیں اور وہ زخموں کی تاب نہ لاکر وہیں چل بسا۔

حادثے کے فوری بعد جائے وقوع پر کثیر تعداد میں لوگ جمع ہوگئے، ان کا کہنا تھا کہ بس ڈرائیور کافی تیزی کے ساتھ ڈرائیورنگ کررہا تھا اور اُسی کی لاپرواہی سے یہ حادثہ ہوا ہے۔ مدھوسودھن  سنڈی کیٹ بینک  کا ملازم تھا اور کچھ ماہ قبل ہی اس کا  ریٹائر منٹ ہوا تھا۔

مینگلور (شمالی) پولس حادثے کی اطلاع ملتے ہی موقع واردات پر پہنچی اور ضروری کاروائیوں کے بعد  معاملہ درج کیا۔ پولس مزید چھان بین کررہی ہے۔