بھٹکل 25/جولائی (ایس او نیوز) ضلع اُترکنڑا کے سرسی تعلقہ کے چپگی چیک پوسٹ پر ایک طالبہ کی موقع پر ہی موت واقع ہوگئی جبکہ اس کے والد اور والدہ شدید زخمی ہوگئے جب ان کی بائک مخالف سمت سے آنے والی ایک سرکاری بس سے ٹکراگئی۔
ذرائع سے ملی اطلاع کے مطابق حادثہ سرسی۔ہبلی روڈ پر بدھ کی صبح پیش آیا جب طالبہ اپوروا (15) اپنے والد اور والدہ کے ساتھ ایک ہی بائک پر سوار اسکول جارہے تھے۔ حادثے میں والد اور والدہ شدید زخمی ہوئے ہیں اور اُنہیں ہبلی کیمس اسپتال لے جایا گیا ہے۔
سرکاری بس کمٹہ سے سرسی ہوتے ہوئے ہبلی جارہی تھی کہ یہ دردناک حادثہ پیش آیا۔ سوشیل میڈیا میں حادثے کی جو تصویریں وائرل ہوئی ہیں، اُس میں دیکھا گیا ہے کہ طالبہ اپوروا کے سرپر سے بس کا پچھلا پہیہ گذر گیا ہے، جس سے اس کی موقع پر ہی موت واقع ہوگئی اور اس کے جسم کے چیتھڑے روڈ پر بکھر گئے۔
اپورواسرسی کے ماروکامبا ہائی اسکول کی طالبہ تھی۔
سرسی۔ماروکٹے پولس تھانہ میں معاملہ درج کیا گیا ہے۔