پٹنہ17فروری(ایس او نیوز؍آئی این ایس انڈیا) بہار کے وزیر اعلی نتیش کمار نے پلوامہ دہشت گردانہ حملے پر سخت رد عمل ظاہر کرتے ہوئے کہا کہ حکومت ہند دہشت گردوں کے اس طرح بزدلانہ حرکتوں کا منہ توڑ جواب دینے کے لئے کے تیار ہے۔ اور ایسی دہشت گرد تنظیموں کو جلد ہی جواب دیا جائے گا۔ نتیش کمار برونی میں ایک جلسہ عام کے دوران بول رہے تھے۔ اس جلسہ عام میں ان کے ساتھ پی ایم مودی بھی موجود تھے۔ نتیش کمار نے کہا کہ اس دہشت گردانہ حملے کے بعد سے پورے ملک میں زبردست غصہ ہے۔ دہشت گردوں نے جن کی بھی مدد سے اس واقعہ کو انجام دیا ہے ملک اسے کبھی معاف نہیں کرے گا۔ سی ایم نے کہا کہ اس دہشت گردانہ حملے میں بہار سے جو جوان شہید ہوئے ان کے خاندان کو ریاستی حکومت ہر ممکن مدد دے گی۔ واضح ہو کہ اس موقع پر پی ایم مودی اور وزیر اعلی نتیش کمار نے ایک ساتھ کئی منصوبوں کا سنگ بنیاد رکھا۔ سی ایم نتیش کمار نے اس دوران پی ایم مودی کا شکریہ بھی ادا کیا۔ غور طلب ہے کہ اس سے پہلے وزیر اعظم نریندر مودی اتوار کو بہار کے لوگوں کو 33 ہزار کروڑ روپے سے زیادہ کے منصوبوں کی ’سوغات‘ دی۔ وزیر اعظم مودی اتوار کو پٹنہ ہوائی اڈے پہنچے اور یہاں سے براہ راست بیگو سرائے کے برونی پہنچے۔ یہاں انہوں نے 33 ہزار کروڑ روپے کی لاگت کے منصوبوں کا سنگ بنیاد اور افتتاح کیا۔ پی ایم یہیں پر 13 سو کروڑ کی لاگت سے بننے والے پٹنہ میں میٹرو ریل پروجیکٹ کا سنگ بنیاد رکھا۔ اس کے علاوہ انہوں نے تقریبا ایک درجن دیگر منصوبوں کا افتتاح بھی کیا۔ وزیر اعظم نریندر مودی کے برونی میں منعقد تقریب میں بہار کے وزیر اعلی نتیش کمار اور نائب وزیر اعلی سشیل کمار مودی بھی موجود تھے ۔پی ایم مودی نے برونی میں ایک جلسے سے خطاب کرتے ہوئے کہا کہ میں محسوس کر رہا ہوں عوام کے دل میں کتنی آگ ہے جو آگ آپ کے دل میں ہے، وہی میرے دل میں ہے۔ مودی نے مزید کہا کہ آج ہزاروں کروڑ کی درجنوں منصوبوں کا معنون اور سنگ بنیاد رکھا گیا ہے۔ اس میں پٹنہ شہر کو سمارٹ بنانے سے منسلک پروجیکٹس ہیں۔