بہار:19ہزار864اساتذہ کی آنے والی ہے ویکنسی
پٹنہ،23؍جولائی(ایس او نیوز؍آئی این ایس انڈیا)بہار کے بے روزگاروں کو تھوڑا سکون دینے والی خبر آئی ہے۔ریاست کے وزیر تعلیم اشوک چودھری نے کہاہے کہ بہت جلدہی بڑی تعداد میں اساتذہ کی بھرتی کے لیے ویکنسی نکالی جائے گی۔اشوک چودھری نے کہاکہ ریاست کے ثانوی اسکولوں میں جلدہی 19ہزار864اساتذہ کی بحالی کی جائے گی۔ریاضی، سائنس، سماجی سائنس، ہندی، سنسکرت سمیت تمام اہم موضوعات کے اساتذہ کی بھرتیاں ہوں گی۔وزیرتعلیم نے یہ باتیں استاد اور گریجویشن شعبہ کے ایم ایل کونسلرکے ساتھ ملاقات میں کہی ۔وزیر تعلیم اشوک چودھری نے کہا کہ سرکاری اور پراجیکٹ ثانوی اسکولوں میں پرنسپل کی تقرری 30ستمبرسے پہلے کرلی جائے گی۔چوتھے درجے کے ملازمین کی قلت دور کرنے کے لیے وزارت مکمل تیاری سے کام کر رہی ہے۔وزیرتعلیم نے کہاکہ ہائی اسکولوں میں کلرک کی بھرتی کے لیے بھی تقریبا تیاریاں مکمل ہو چکی ہیں۔انہوں نے کہا کہ بہت جلد محکمہ خالی عہدوں پراسٹاف سلیکشن کمیشن کوسفارشات سونپ دے گا۔اس کے بعد SSCہی ملازمین کی تقرری کے عمل کومکمل کرے گا۔اشوک چودھری نے کہاہے کہ گزشتہ کچھ وقت سے اسکولوں میں چوری کے واقعات بڑھ گئے ہیں جس کی وجہ سے وہاں وسائل کافقدان ہوجاتاہے۔اس مسئلے سے نمٹنے کے لیے اسکولوں میں نائٹ گارڈکی تقرری ہوگی۔گارڈزکوچارہزارروپے فی ماہ کااعزازیہ دیاجائے گا۔