بہار: سمستی پور میں مظاہرین پر فائرنگ ، ایک شخص ہلاک
سمستی پور ، 20؍اکتوبر ( ایس او نیوز؍آئی ا ین ایس انڈیا)سمستی پور/بہار میں ایک ادویہ تاجر کے مبینہ قتل کے خلاف مظاہر ہ کر رہے مظاہرین پر پولیس فائرنگ سے ایک شخص کی موقع پر ہی ہلاکت ہوگئی ۔اور چار دیگر افراد زخمی ہوگئے۔ واضح ہو کہ ادویہ تاجر جناردن ٹھاکر کا 18 اگست کو نامعلوم افراد کی مبینہ گولی باری سے موت ہوگئی تھی ۔ مبینہ قتل کے خلاف مقامی افراد مجرموں کی گرفتاری کا مطالبہ کر رہے تھے اور قاتلوں کی گرفتاری کا مطالبہ کے پیش نظر تاج پور پولیس اسٹیشن کا گھیراؤ کرنے آئے تھے ۔ قاتلوں کی عدم حراست کی وجہ سے دیہی باشندوں نے تاج پور پولیس اسٹیشن کا گھیراؤ کرکے توڑ پھوڑ کی ۔ پولس نے اس موقعہ پر 10سے 15راؤنڈ گولیاں چلائی جس سے مظاہرہ میں شامل ایک شخص ہلاک ہوگیا جبکہ وہیں چار دیگر مظاہرین کے زخمی ہونے کی اطلاع ہے ۔ مظاہرین پر مبینہ پولیس فائرنگ سے مشتعل ہو کر جہاں دیہی باشندوں نے تاج پور اسٹیشن کا محاصرہ کیا وہیں قومی شاہراہ NH-28پرٹائروں میں آگ لگا کر مکمل بند کر دیا ہے جس سے نقل و حمل متاثر ہوئی ہے ۔ مظاہرین کا کہنا ہے کہ جب تک ضلع انتظامیہ کا کوئی اعلی آفیسر پہنچ کر قاتلوں کی گرفتاری اور پولیس فائرنگ سے ہلاک شدہ شخص کے اہل خانہ کو معاوضہ نہیں ملتا وہ قومی شاہراہ کو بند کئے رہیں گے اور کسی بھی گاڑی کی آمد و رفت غیر مجاز ہوگی ۔