بھٹکل کی بیفا کو اب نیشنل فٹ بال سیون ٹورنامنٹ میں کرناٹک سیون ٹیم کی نمائندگی کرنے کا سنہرا موقع؛ بہترین پرفارمینس کے پیش نظر بیفا منتخب
بھٹکل یکم مارچ (ایس او نیوز) بھٹکل انٹر فٹ بال اسوسی ایشن (BIFA) اب کرناٹک کی نمائندگی کرتے ہوئے آل انڈیا سنئیر نیشنل فٹ بال سیون چمپن شپ 2018 کھیلنے کی تیاری میں ہے جو مورخہ 4 اور 5 مارچ کو مہاراشٹرا کے اورنگ آباد میں منعقد کیا گیا ہے۔ نیشنل لیول کا یہ ٹورنامنٹ فٹ بال سیون اسوسی ایشن انڈیا کی جانب سے منعقد کیا گیا ہے۔
ساحل آن لائن کو معلومات فراہم کرتے ہوئے فٹ بال سیون اسوسی ایشن آف کرناٹک کے صدر رنجیت کمار نے بتایا کہ حال ہی میں باگلکوٹ میں ہوئے فٹ بال ٹورنامنٹ میں اُنہیں بھٹکل کی اس ٹیم کو کھیلتے ہوئے دیکھنے کا موقع ملا، بعد میں بنگلور اور دیگر ٹورنامنٹوں میں بھی ان کے بہترین پرفارمینس اور کھلاڑیوں کے زبردست کھیل کو دیکھتے ہوئے ہم نے اس ٹیم کو آگے بڑھانے کے لئے اس بار اس ٹیم کو ریاست کی نمائندگی کرتے ہوئے نیشنل لیول کے ٹورنامنٹ کے لئے منتخب کیا ہے۔ انہوں نے توقع ظاہر کی کہ یہ ٹیم بہترین کھیل کا مظاہرہ پیش کرتے ہوئے قومی سطح پر اپنی بہترین صلاحیتوں کا لوہا منوائیں گے۔
ساحل آن لائن سے گفتگو کرتے ہوئے بیفا کے کوچ ماویہ محتشم نے اپنی ٹیم کو قومی سطح کے ٹورنامنٹ میں کھیلنے کا موقع فراہم کرنے پر نہایت خوشی کا اظہار کرتے ہوئے بتایا کہ اس سے ٹیم کے تمام کھلاڑیوں کو اپنا بہترین پرفارمینس پیش کرنے کا نایاب موقع ہاتھ آگیا ہے اور نیشنل لیول کے ٹورنامنٹ میں ہمارے کھلاڑیوں کی بہترین پرفارمینس سے کھلاڑیوں کو مزید آگے بڑھنے کا موقع ملے گا۔
ماویہ نے بتایا کہ ظُہیر ارمار ٹیم کی قیادت سنبھالیں گے، ندید کاڈلی، افضان جبالی، تابش گوائی اور محمد کُمیل ٹیم میں شامل ہوں گے۔کرناٹک اسٹیٹ فٹ بال سیون اسوسی ایشن کے صدر رنجیت کمار ٹیم کے مینجر ہوں گے۔
رنجیت کمار کے مطابق نیشنل لیول کے اس ٹورنامنٹ میں فاتح بننے والی ٹیم اور رنرزآپ ٹیم کو انٹرنیشنل ٹورنامنٹ میں کھیلنے کا موقع ملے گا جو جنوبی امریکہ اور دبئی میں اسی سال اپریل میں ہوگا۔ ٹورنامنٹ میں یوکے اور چیلے سے انٹرنیشنل آفیشیل شریک ہوں گے۔
بھٹکل کی اس فٹ بال ٹیم کو قومی سطح پر اپنے جوہر دکھلانے کا بہترین موقع ہاتھ آنے پر ٹیم کے کھلاڑیوں میں نہایت جوش وخرش پایا جارہے ، ایسے میں بھٹکل کے تمام عوام نے اُنہیں نیک تمنائوں کا اظہار کیا ہے ۔
