بھٹکل:29/ نومبر (ایس اؤنیوز)ہمارے مقاصد اور منزلیں محدود ہونے کی وجہ سے ہم حدود میں ہی رہ جاتےہیں۔ہماری منزل اور ہمارے مقاصد جلیل ہونے چاہئے ، ہماری پیدائش ایک خلیفہ کی حیثیت سے کی گئی ہے ہمارے اندر عالمی قیادت کی صفات ہیں ہم صرف ملکی سطح تک نہیں بلکہ عالم کی قیادت کرنے والی خصوصیات و صفات پیدا کریں ہمیں اس کا شعور ہونا چاہئے اور اس کے لئے ہمیشہ کوشاں رہنا چاہئے۔ ان خیالات کا اظہار انجمن پی یو کالج کے پرنسپال محمد یوسف کولا نے کیا ۔

وہ یہاں جامعہ آباد رو ڈ پرواقع تربیت اخوان ایجوکیشن سوسائٹی کے سید علی کیمپس میں نیو شمس اسکول اور شمس انگلش میڈیم ہائی اسکول کے سالانہ ثقافتی اور ادبی مقابلہ جات کا پروگرام میں بحیثیت مہمان خصوصی خطاب کررہے تھے۔ نیو انگلش پی یو کالج کے پرنسپال وریندر شانبھاگ نے خطاب کرتے ہوئے کہاکہ موجودہ دور کے تعلیمی نظام میں کافی تبدیلیاں آئی ہیں۔ کل تک تعلیم کو حاصل کرنا مشکل تھا آج بہت آسانی کےساتھ ہمیں تعلیم ملتی ہے۔ جدید دور کی تکنکی سہولیات کا فائدہ اٹھاتے ہوئے طلبا میں تعلیمی معیار کو اعلیٰ کرنے اور انہیں اخلاقی طورپر مستحکم کرنے کی اپیل کی۔

سوسائٹی کے نائب صدر سید اشرف برماور نے پروگرام کی صدارت کرتے ہوئے کہاکہ یہ دور اسمارٹ کہلاتاہے طلبا بھی اسمارٹ ہیں ثقافتی اور ادبی مقابلہ جات میں طلبا سرگرم حصہ لیتے ہوئے اپنی صلاحیتوں کو مزید نکھارنے کی طرف توجہ دلائی ۔ شمس انگلش میڈیم ہائی اسکول کے صدر مدرس ایم آر مانوی نے استقبال کیاتو استاد نذیف نے مہمانوں کا تعارف پیش کیا ۔ شازیر حسین نے افتتاحی کلمات پیش کئے ۔ مولانا عبدالسبحان ندوی نے شکریہ اداکیا۔اسکول کے طلبا عبدالطیف اور محمد نے نظامت کے فرائض انجام دئیے ۔ ادارے کے بزرگ رکن ، سماجی کارکن سید حسن برماور، مولانا عزیز الرحمن ندوی ، سکریٹری محمد طلحہ سدی باپا ، مولانا ایس ایم سید زبیر ، یحییٰ رکن الدین وغیرہ موجود تھے۔