بھٹکل کے معروف ماہر تعلیم، شاعر اور کئی اداروں کےسرگرم رُکن اشرف برماور انتقال کرگئے
بھٹکل 7/اپریل (ایس او نیوز) بھٹکل کی معروف شخصیت، ماہر تعلیم، شاعر اور کئی ایک اداروں کے سرگرم رکن جناب سید اشرف برماور آج سنیچر صبح اپنی رہائش گاہ نور باغ، جالی روڈ بھٹکل میں انتقال کرگئے۔ انا للہ و اناالیہ راجعون۔ وہ 72 برس کے تھے۔
مرحوم کی شخصیت بے حد متحرک اور فعال تھی،بھٹکل کا معروف قومی و سماجی ادارہ مجلس اصلاح و تنظیم بھٹکل کے رکن انتظامیہ تھے۔ انہوں نے معروف قومی تعلیمی ادارہ انجمن حامئی مسلمین کے کئی سالوں تک رکن انتظامیہ رہ کر خدمات انجام دی، وہ جماعت اسلامی کے کارکن اور معروف انگریزی میڈیم شمس اسکول کے سابق سکریٹری اور تاحال نائب صدر کے عہدہ پر فائز تھے۔ الکوثر گرلز کالج، دعوت سینٹر، بھٹکل ویلفئیر اسپتال، بھٹکل ویلفئیر سوسائٹی سمیت متعدد اداروں کے ذمہ داران میں سے تھے۔ وہ ادارہ ادب اسلامی کے صدر اور ویلفئیر پارٹی آف انڈیا کے سابق صدر بھی تھے۔
سوشیل میڈیا پر کچھ لوگوں نےسید اشرف برماور کو شمس کی چلتی پھرتی تصویر قرار دیا ہے، جبکہ ان کے تعلق سے بتایا گیا ہے کہ وہ برادران وطن میں اسلام کی دعوت پہنچانے کے بڑے فکر مند رہتے تھے اور اپنے قریبی علاقوں میں ٹھیک سے کنڑا زبان نہ آنے کے باوجود برادران وطن سے ملاقات کرتے ہوئے انہیں اسلام کی دعوت دینے کی کوشش کرتے تھے۔ خبر ملی ہے کہ ان کا ایک شعری مجموعہ بھی زیرترتیب ہے۔
صبح قریب دس بجے ان کے انتقال کی خبر ملتے ہی عوام کی کافی بڑی تعداد ان کے مکان پر جمع ہوگئی اور گھروالوں کے ساتھ تعزیت کرتے ہوئے دعائے مغفرت کی۔ بعد نماز عصر نوائط کالونی تنظیم جمعہ مسجد میں ان کی نماز جنازہ ادا کی گئی اور قریبی قبرستان میں تدفین عمل میں آئی۔
موصوف نڈر اور بے باک انسان ہونے کے ساتھ ساتھ مخلص، کم گو، سادہ مزاج اور نہایت متحرک شخص تھے۔
وہ قریب 20/25 سال قبل جالی کے اُس علاقہ میں جاکر آباد ہوئے تھے، جو اُس وقت جنگلات سے گھرا ہوا تھا اور قریب میں کوئی مسلم گھر بھی نہیں تھا، اسی بات سے اندازہ لگایا جاسکتا ہے کہ وہ کتنے بے خوف انسان تھے۔ وہ اپنے پیچھے بیوہ، دو لڑکیاں اور تین فرزندان کو چھوڑ کر ہمیشہ ہمیش کے لئے وداع ہوگئے۔
مرحوم کی خدمات کا اعتراف کرتے ہوئے قائد قوم جناب ایس ایم سید خلیل الرحمن، مجلس اصلاح و تنظیم بھٹکل کے صدر جناب مزمل قاضیاء، جنرل سکریٹری محی الدین الطاف کھروری، نائب صدر اور جے ڈی ایس لیڈر عنایت اللہ شاہ بندری، ادارہ تربیت اخوان کے صدر عبدالقادر باشہ رکن الدین سمیت کافی ذمہ داران نے ان کے انتقال پر گہرے دکھ اور افسوس کا اظہار کرتے ہوئے مرحوم کی مغفرت اور لواحقین کیلئے صبر جمیل کی دعا کی ہے۔ کئی ایک نے اپنے بیان میں اس بات کا تذکرہ کیا ہے ان کی موت سےان کی ابیاری کئے ہوئے اداروں میں ایک خلاء پیدا ہوا ہے، جس کی تلافی آسان نہیں ہوگی۔ اللہ تعالیٰ ان کی جملہ خدمات کو قبول فرمائے اور جنت الفردوس میں اعلیٰ مقام عطا فرمائے۔ امین