بھٹکل 22/ جنوری (ایس او نیوز) بھٹکل آزاد نگر کے ایک طالب العلم محمد فیضان کو نہ صرف اپنی کالج بلکہ ریاست کی مشہور و معروف ویشویشوریا ٹیکنالوجیکل یونیورسٹی بیلگام میں اول رینک حاصل ہوا ہے، جس کے نتیجے میں ریاست کے گورنر کے ہاتھوں اُنہیں گولڈ میڈل سے نوازا گیا ہے۔
سنیچر 21/جنوری کو بیلگام کے ویشویشوریا ٹیکنالوجیکل یونیورسٹی میں منعقدہ 16 ویں سالانہ تقریب میں کرناٹک کے گورنر اور یونیورسٹی کے چانسلر وجو بھائی والا نے محمد فیضان کو گولڈ میڈل سے نوازتے ہوئے اُن کی تہنیت کی۔
خیال رہے کہ محمد فیضان نے بھٹکل انجمن انجینرنگ کالج میں بی ای کی ڈگری حاصل کرنے کے بعد ناگآرجنا کالج آف انجینرنگ اینڈ ٹیکنالوجی، بنگلورسے ایم ٹیک کا امتحان دیا تھا، جس میں انہوں نے اپنی ذہانت کا سکہ جماتے ہوئے پوری یونیورسٹی میں ٹاپ رینک حاصل کیا ہے اورپورے شہر بھٹکل کا نام روشن کردیا ہے۔
بتایا گیا ہے کہ غریب خاندان کے چشم چراغ محمد فیضان کو ان کی والدہ ممتاز بیگم نے گھر میں بنائی جانے والی مٹھائیاں فروخت کرکے اعلیٰ تعلیم دلائی ہے اور بیٹے نے بھی جم کر محنت کرتے ہوئے اور اپنی صلاحیتوں کا لوہا منواتے ہوئے پوری یونیورسٹی میں اول مقام حاصل کیا ہے۔ ایسی زبردست کامیابی پر بھٹکل انجمن حامئی مسلمین کے ذمہ داران سمیت مجلس اصلاح و تنظیم بھٹکل اور بھٹکل مسلم یوتھ فیڈریشن کےذمہ داران نے بھی انہیں مبارکباد پیش کی ہے۔