بھٹکل میں میلاد النبی ﷺ کی پیس میٹنگ میں ڈی جے اور بیانرکو لے کر ہنگامہ : پولس کی مداخلت سے معاملہ حل
بھٹکل:29/ نومبر (ایس اؤنیوز)عید میلاد النبی ﷺ کی مناسبت سے تعلقہ انتظامیہ کی طرف سے تحصیلدار دفتر میں پیس میٹنگ منعقد کی گئی، جہاں جلوس اور جلسہ کو لے کر دو گروہوں کے درمیان ڈی جے اور بیانر کو لے کر تنازعہ پیدا ہوا، جس سے کچھ دیر کے لئے ہنگامہ ہوگیا۔ مگر پولس نے مداخلت کرتے ہوئے آپسی تال میل کے ذریعے میلاد النبی ﷺ کا جلسہ منعقد کرنے کاحکم صادر کیا۔
آئی اے ایس پروبیشنری افسر آنند، تحصیلدار وی این باڈکر کی نگرانی میں میلاد النبی ﷺ کے پروگرام کو پُر امن طور پر منانے کے مقصد کو لے کر میٹنگ منعقد کی گئی تھی ۔میٹنگ میں ادارہ فیض الرسول اور بزم فیض الرسول کے عہدیداران اور ممبران کے درمیان میلاد البنیﷺکا جلسہ اپنے ہی بیانر پر منانے اور ڈی جے کےاستعمال کو لے کر فریقین میں اتفاق نہ ہو پانے پر کچھ دیر کے لئے میٹنگ میں ہنگامہ ہوا۔
اس موقع پر پولس انسپکٹر کمار سوامی نے دوگروہوں سے کہاکہ میلاد النبی ﷺ کا جلسہ الگ الگ منعقد کرنے کی اجازت نہیں دی جائے گی ۔ دونوں گروہوں کی طرف سے فی گروہ 4ممبران اور ایک مولانا کو لےکر سرو دھرم میلاد محاذ کے بیانر تلے جلسہ منعقد کریں۔ انہوں نے کہا کہ اس دوران ڈی جے کا قطعی طورپر استعمال کرنے نہیں دیا جائےگا اگر دونوں گروپ متفق نہیں ہیں تو کسی کو بھی منظوری نہیں دی جائے گی البتہ انہوں نے مائک کی اجازت دی ۔ انہوں نے میلاد النبی منانے والوں سے کہا کہ اُن کی وجہ سے عوامی سطح پر کسی کو بھی تکلیف نہیں ہونی چاہئے اور میلاد کو پرامن طریقے سے ہی منانا چاہئے۔ پولس انسپکٹر کی ہدایات کو دونوں گروہوں نے قبول کرتے ہوئے تعلقہ انتظامیہ کی ہدایات کے مطابق میلاد منانے کا تیقن دیا۔ میٹنگ میں کے ایم شریف، منیر، خواجہ معین الدین، پی ایس آئی کوڈگونٹی ، پرمیشور سمیت کئی لوگ موجود تھے۔