بھٹکل:16/ مارچ (ایس اؤنیوز) مادرِ علمی کی بڑی اہمیت ہے یہ وہی جگہ ہے جہاں طلبا کی زندگی تشکیل پاتی ہے سجتی ہے سنورتی ہے، طلبا کو چاہئے کہ وہ آگے چل کر اپنے مادرِ علمی کی ترقی میں اپنا کردار ا دا کریں۔ ان خیالات کا اظہار شمس انگلش میڈیم ہائی اسکول کے صدر مدرس محمد رضا مانوی نےکیا۔
وہ یہاں بندر کی سرکاری پرائمری اسکول میں 7ویں طلبا کے لئے سجائی گئی وداعی تقریب میں مہمان ِ خصوصی کی حیثیت سے طلبا سے مخاطب تھے۔ موصوف نے کہاکہ والدین ، اساتذہ اور معاشرے کے بزرگوں کی ہم قدر کریں ، عزت واحترام سےپیش آئیں، انہوں نے طلبا سے کہاکہ زندگی میں کتنی مشکلات پیش آئیں ان کا سامنا کرنے کی قوت پیدا کریں، طلبا سے کہاکہ معاشرے میں چھیرپھاڑ کرنے والے درندے ہیں ان کے درمیان ہم اپنے بہترین اخلاق کے ذریعے ایک انسانی زندگی کاعملی نمونہ پیش کریں۔ جس اسکول سے ہم تعلیم پائے ہیں وہ صرف ہمیں کمانے کا طریقہ ہی نہیں سکھاتی بلکہ بہتر زندگی گزارنے کی تربیت بھی کرتی ہے ،طلبا دھن دولت کے نشہ میں غرور و تکبر نہ کریں بلکہ عاجزی و انکساری کو اپناتے ہوئے ایک بہتر معاشرے ، ملک کی تعمیر میں اپنا رول اداکرنےکی بات کہی ۔
اسکول کی صدرمدرسہ شریمتی ممتا واڈیکر نے بھی خطاب کرتے ہوئے طلبا کو مستقبل کے متعلق مفید صلاح ومشوروں سے نوازا۔ گرام پنچایت کے سابق صدر منجوناتھ کھاروی نے تقریب کی صدارت کی۔ سنئیر استاد پانڈورنگا نائک نے افتتاحی کلمات پیش کرتے ہوئے استقبال کیا۔ استاد تمپا ڈی گونڈ نے شکریہ اداکیا۔ رتناکر کھاروی، کرشنا کھاروی، یوتھ سنگھ کے صدر رام کھاروی ڈائس پر موجود تھے۔