دبئی میں ملازمت کرنے والے بھٹکل کے نوجوان کی شارجہ میں موت؛ آج کی گئی نوجوان کی شناخت
بھٹکل 26/اگست (ایس او نیوز) بھٹکل گڈلک روڈ کے رہائشی محمد ابصر محتشم (30) جس کی نعش متغیر حالت میں شارجہ میں اُسی کے فلیٹ سے 23اگست کو برآمد کی گئی تھی، آج اُس کے بھائی کی مدد سے شناخت کے بعد اُن کے حوالے کرنے کاغذی کاروائی جاری ہے۔ توقع ہے کہ کل پیر کو میت بھائیوں اور رشتہ داروں کے حوالے کی جائے گی اور کل ہی شارجہ قبرستان میں تدفین عمل میں آئے گی۔
اطلاع کے مطابق محمد ابصر محتشم دبئی کے ایک بزنس مال میں سیلس مین کے طور پر ملازمت کرتا تھا، جب وہ بدھ کو ڈیوٹی پر حاضر نہیں ہوا تو دکان کے دوسرے ملازمین نے اس سے فون پر رابطہ کرنے کی کوشش کی مگر رابطہ نہ ہوسکا، اگلے روز جمعرات کو بھی جب اس سے رابطہ نہیں ہوا تو دکان کے دیگر اسٹاف اس سے حال چال دریافت کرنے شارجہ اُس کے فلیٹ پہنچے، بتایا گیا ہے کہ اُسی وقت وہاں فلیٹ کے پڑوس کے لوگوں نے پولس کو متعلقہ فلیٹ سے عجیب قسم کی بدبو آنےکی شکایت کرتے ہوئے پولس کو طلب کیا تھا۔ پولس جب دروازے کو توڑ کر فلیٹ کے اندر داخل ہوئی تو متغیر حالت میں ایک نعش پائی گئی ۔ پولس نعش کو فوری اپنی تحویل میں لیتے ہوئے اسپتال لے گئی۔
بتایا گیا ہے کہ محمد ابصر چار دیگر ساتھیوں کے ساتھ متعلقہ فلیٹ میں رہائش پذیر تھا، عید کی بنا پر چاروں ساتھی انڈیا چلے گئے تو وہ فلیٹ میں اکیلا تھا۔ خبر ملی ہے کہ ابصر محتشم نے آخری بار اتوار رات کو یعنی 20/اگست کو بھٹکل میں اپنی والدہ سے فون پر بات کی تھی اور کہا تھا کہ مرحوم والد کے ایصال ثواب کے لئے دو بکروں کو صدقہ کریں، جبکہ بتایا گیا ہے کہ منگل صبح اُس نے عیدالاضحیٰ کی نماز پڑھنے کے بعد قریب دس بجے اپنے ایک دوست کو وہاٹس ایپ پر عید کی مبارکباد پیش کی تھی اور کھانے کے لئے بلانے پر جواب دیتے ہوئے کہا تھا کہ اُس کے گلے میں کچھ تکلیف ہے، لہٰذا وہ کھانے پر نہیں آسکے گا ۔اُس کےبعد سے وہ کسی کے رابطے میں نہیں آیا۔ سمجھا جارہا ہے کہ اُسی شام یا رات کو بند کمرے میں اُس کا انتقال ہوا ہوگا۔ مگر دو دن گذرنے کے بعد یعنی جمعرات کو پولس نے اس کی نعش اپنی تحویل میں لی۔ جمعہ کو کمپنی کے کسی ملازم نے دبئی جماعت کے سکریٹری اور فعال سماجی کارکن جناب جیلانی محتشم کو واقعے کی جانکاری دی، جو فوری اُس کے دو قریبی رشتہ داروں کو اطلاع دینے کے ساتھ ساتھ اُنہیں لے کر متعلقہ پولس تھانہ پہنچ گئے۔ مگر نعش کی حالت دیکھ کر شناخت کرنا مشکل ہوگیا ۔
واقعے کی جانکاری ملتے ہی جدہ سے محمد ابصر محتشم کے بھائی عمیر دبئی پہنچے اور آج اتوار کو نعش کی شناخت کرلی۔
محمد ابصرمحتشم کے بہنوئی سمیر جوکاکو نے بتایا کہ ابصر سن 2011 سے دبئی میں ملازمت کررہا تھا، چھٹیوں میں وہ بھٹکل آنے کے بعد قریب چار ماہ قبل ہی وہ دوبارہ دبئی گیا تھا۔
محمد ابصر کے انتقال پر گھروالوں سمیت اُس کے دوست احباب نے گہرے رنج و غم کا اظہار کیا ہے، رشتہ داروں ، ساتھیوں اور ابصر کے دوستوں نے گھروالوں سے صبر کی تلقین کرتے ہوئے اللہ سے اُس کی مغفرت کی دُعائیں کی ہیں۔ اللہ اس نوجوان کی مغفرت فرمائے کوتاہیوں اور لغزشوں کو معاف فرماتے ہوئے جنت الفردوس میں اعلیٰ مقام عطا فرمائے۔ اٰمین