بھٹکل: 31؍اکتوبر (ایس او نیوز) آئندہ دنوں میں منائے جانے والے دیوالی تہوار اور تلسی پوجا کے موقع پر غیر رجسٹر پٹاخوں کی فروخت کاری کے خلاف تعلقہ انتظامیہ نے سخت قانونی کارروائی کئے جانے انتباہ دیا ہے۔
بدھ کو تحصیلدار دفتر میں تحصیلدار وی این باڈکر کی قیادت میں پٹاخہ دکاندار اور افسران کے ساتھ میٹنگ کا انعقاد ہوا۔ میٹنگ میں تحصیلدار نے کہاکہ پٹاخوں کی دکانیں عوامی رہائشی علاقوں سے دور ہونی چاہئے اور اس سلسلے میں فائر برگیڈ دفتر سے منظوری نامہ لینا ہوگا۔
میٹنگ کے بعد اخباری نمائندوں سے بات کرتے ہوئے تحصیلدار باڈکر نے کہاکہ تعلقہ میں 3رجسٹرڈ پٹاخہ فروخت کار ہیں، صرف انہی کو پٹاخوں کوبیچنے کا پروانہ دیاگیا ہے۔ منظوری لئے بغیر اگر کسی نے پٹاخوں کا بیوپار کیااور اس کے متعلق کوئی شکایت ہمیں موصول ہوئی تو چھاپہ مارکر قانون کے مطابق کارروائی کرنے کا انتباہ دیا۔ اس موقع پر بلدیہ چیف آفیسر وینکٹیش ناؤڈا، تعلقہ پنچایت مینجر سدھیر گاؤنکر وغیرہ موجود تھے۔