بھٹکل :9/ اکتوبر(ایس اؤ نیوز) تعلقہ کے مختلف اسکولوں کو محکمہ تعلیمات کی جانب سے مہیا کئے گئے یونیفارم معیاری نہیں ہونے پر تعلقہ پنچایت ممبران نے سخت اعتراض جتانےکا واقعہ منگل کو منعقدہ تعلقہ پنچایت کے عام اجلاس میں پیش آیا ہے۔
میٹنگ کے دوران یونیفارم معاملے کو پیش کرتےہوئے ممبر پاشورناتھ جین نے کہاکہ یونیفارم بہت ہی پتلے کپڑے کا ہونے سے طلبا پہننے سے انکار کررہے ہیں۔ انہوں نے محکمہ سے مطالبہ کیا کہ وہ یونیفارم واپس لے کر دوبارہ بہتر ین معیار کا یونیفارم بچوں کو مہیا کرے۔ اس کی وضاحت کرتے ہوئے بی ای اؤ ، منجی نے کہاکہ یونیفارم ریاستی حکومت سے فراہم کئے جاتے ہیں، اس معاملے میں ہم کچھ بھی نہیں کرسکتے ، البتہ اس سلسلے میں اعلیٰ افسران کو جانکاری دینےکی بات کہی۔
بھٹکل سرکاری اسپتال کے انتظامات پر بات کرتے ہوئے ممبر وشنو دیواڑیگا نے کہاکہ اسپتال میں صرف 2 ڈیالسس کے مشینیں ہونے سے زائد مریضوں کو علاج کرنا ممکن نہیں ہورہاہے۔ گزشتہ 4ماہ سے مریض ڈیالسس کے بغیر یوں ہی لوٹ رہے ہیں، اس سلسلے میں فوری کارروائی کرنے کی مانگ کی۔ انہوں نے کہاکہ کسان زمینات کا پٹہ حاصل کرنے کے لئےاپنے کام کاج چھوڑ کر تحصیلدار دفتر کے سامنے کھڑے ہونے پر مجبور ہیں۔ کسانوں کو سہولیات فراہم کرنے کے لئے دیہی سطح پر ہی انہیں زمینات کا پٹہ دینے کےلئے مناسب انتظام کرنے کی بات کہی۔ ان کے علاوہ جئے لکشمی گونڈ نے زرعی مسائل اور سڑکوں کے متعلق بات پیش کی۔ تعلقہ پنچایت صدر ایشور بلیا نائک نےمیٹنگ کی صدارت کی۔ نائب صدر رادھا وئیدیا ، اسٹانڈنگ کمیٹی چیرمن میناکشی جٹپا نائک ، پنچایت آفیسر جی ایم مرگوڈ موجود تھے۔