عدم تحفظ کا شکار بھٹکل میونسپالٹی ملازمین کا اسسٹنٹ کمشنر سے حفاظتی اقدامات کا مطالبہ؛ چیف آفیسر ہنوز لاپتہ
بھٹکل:18/ستمبر (ایس اؤنیوز)جمعرات کو میونسپالٹی عمارت پر پتھراؤ کے 4دن مکمل ہوگئے ہیں مگر میونسپالٹی کے ملازمین اب بھی کام کرنے میں خوف محسوس کررہے ہیں ۔ انہوں نے آج پیر کو بھٹکل اسسٹنٹ کمشنر ایم این منجوناتھ کو میمورنڈم پیش کرتے ہوئے مناسب حفاظتی اقدامات کا مطالبہ کیا ہے۔
میمورنڈم میں بتایا گیا ہے کہ جب میونسپالٹی کی دکانوں کو تحویل میں لیا جارہاتھاتو ہم ورکرس لوگ اعلیٰ افسران کی ہدایات پر عمل کرتے ہوئے اپنی ڈیوٹی انجام دے رہے تھے، جس کے دوران ایک دکاندار نے اپنے آپ کو آگ میں جھونکتے ہوئے خودکشی کی کوشش کی، جس کے بعد میونسپل چیف آفیسر اور ملازمین پر حملہ کیا گیا، ساتھ ساتھ میونسپالٹی عمارت پر بھی پتھراؤ کیا گیا ، ایسے حالات میں ہم سبھی ملازمین جان کا خطرہ محسوس کررہے ہیں۔ میمورنڈم میں کہا گیا ہے کہ اعلیٰ افسران اور پولس افسران کی موجودگی میں حملہ کی کوشش کی گئی اوراور پتھراؤ کرتے ہوئے عمارت کو نقصان پہنچایا گیا ہے۔ جس کی وجہ سے ملازمین عدم تحفظ کا شکار ہیں۔
بتایا گیا ہے کہ ٹیکس شعبہ میں خدمات انجام دینےو الے ٹیکس افسر اور ٹیکس وصولی کے معاون آفسر خوف کے مارے ابھی تک بلدیہ دفتر نہیں آرہے ہیں، مزید یہ کہ افسران پر ہی قتل کی کوشش کئے جانے کا الزام لگا کر کیس داخل کیا گیا ہے۔ میمورنڈم میں مطالبہ کیا گیاہے کہ حالات کے پیش نظر اعلیٰ افسران، ملازمین اور عمارت میں موجود دستاویزات کو تحفظ فراہم کیا جائے، اور دکانوں کی تحویلی کارروائی کو محکمہ تحصیلدار کے حوالے کیا جائے۔ بلدیہ اسوسی ایشن کے صدر وینو گوپال شاستری ، وینکٹیش ناوڈا، کرن این سمیت 24بلدیہ ملازمین و عملہ موجود تھا۔
اس موقع پر موجود میونسپالٹی صدر محمد صادق مٹا ، نائب صدر کےا یم اشفاق، اسٹانڈنگ کمیٹی چیرمن عبدالرحیم کلئی والا نے ملازمین کی مکمل حمایت کرتے ہوئے اسسٹنٹ کمشنر سے ضروری حفاظتی اقدامات کامطالبہ کیا۔ اے سی منجوناتھ نے یقین دلایا کہ وہ اس معاملے کو لے کر حفاظتی اقدامات کے سلسلے میں پولس افسران سے بات چیت کریں گے۔
بلدیہ دفترپر پتھراؤ اور عملے پر حملہ ہوکر 4 روز گزرنے کے بعد بھی بلدیہ چیف آفیسر شنکرپا ابھی تک لاپتہ ہیں اور کسی کے رابطے میں نہیں آرہے ہیں۔موصولہ اطلاعات کے مطابق حملہ کا شکار ہونے کے بعد ساگر تعلقہ کے کسی اسپتال میں علاج کرنے کے بعد وہ اپنے گھر چلے گئے ہیں۔ اس تعلق سے بات کرتے ہوئے اے سی منجوناتھ نے کہاکہ جب چیف آفیسر کسی کے رابطہ میں نہیں ہیں تو ہمارا اس تعلق سے کچھ کہنا ممکن نہیں ہے۔