بھٹکل:19؍فروری (ایس او نیوز) پیر کی شام بھٹکل میونسپالٹی ہال میں بلدیہ صدر محمد صادق مٹا کی صدارت میں میونسپالٹی کی  مختلف مارکیٹوں کی نیلامی کی کاراوئی انجام دی گئی، مگر  نئی مچھلی مارکٹ کو لے کر ٹھیکیداروں اور آفسران سمیت عوامی نمائندوں کے ساتھ  ہوئی گرما گرم بات چیت کے بعد  آخرکار مچھلی مارکٹ کی نیلامی کو موخر کردیا گیا۔

پیر کو میٹنگ میں جب نئی مچھلی مارکیٹ کی نیلامی کی بات آئی تو ٹھیکداروں نے افسران اور عوامی نمائندوں کو آڑے ہاتھوں لیتے ہوئے کہاکہ ابھی  نئی مارکیٹ میں مچھلیوں کا بیوپار شروع ہی نہیں ہواہےتو ایسے میں مارکیٹ میں کون لوگ مچھلیوں کی خرید و فروخت کے لئے آئیں گے ؟ پہلے مچھلی بیوپاریوں کو نئی مچھلی مارکٹ میں آنے کو یقینی بنائیں، اُسے سے قبل نئی مچھلی مارکٹ کی  دکانوں کی نیلامی صحیح نہیں ہے۔ اور ایسے میں مچھلی بیوپاریوں سے رقم وصول کرنا بھی ممکن نہیں ہے۔ ٹھیکیداروں نے مطالبہ کیا کہ میونسپالٹی حکام  پہلے راستوں کے  کنارے مچھلی بیچنے والی خواتین کو مارکیٹ میں  جاکر  بیٹھنے کہیں، اس کے بعد ہی پرانی مارکیٹ کے بیوپاری بھی نئی مارکیٹ کارخ کریں گے۔

ٹھیکداروں کے سوالات پر  بلدیہ چیف آفیسر دیوراج نے وضاحت کرتے ہوئے کہاکہ ساحلی ترقی بورڈ کی جانب سے تعمیر کردہ نئی مچھلی مارکیٹ کو میونسپالٹی کی تحویل میں دیاگیا ہے، اس سلسلے میں ہم نے مچھلی بیوپاریوں کو منتقل ہونے کے لئے  کہہ رہے ہیں انہیں سمجھایا بھی جارہا ہے ۔ اس پر ایک ٹھیکدار نے سوال کیا کہ اگر پرانی مارکیٹ کے  مچھلی بیوپاری  یکم اپریل سے  نئی مارکیٹ میں  منتقل نہیں ہوتے  ہیں تو کیا  ٹھیکداروں کو پرانی مارکیٹ میں وصولی کرنے کی   بلدیہ سہولت دے گی؟

بلدیہ صدر محمد صادق مٹا نے ٹھیکداروں کی شکایات و مسائل پر وضاحت کرتے ہوئے کہاکہ اس سلسلے میں عام میٹنگ میں  قرار داد پاس کی گئی ہے کہ جب  نئی مارکیٹ میں وصولی کے کارروائی کریں گے تو  اُسی طرح پرانی مچھلی مارکیٹ میں سہولیات کی کمی کی جائے گی  جس سے   بیوپاریوں کے لئے ضروری ہوجائے گا کہ وہ  خود بخود نئی مچھلی  مارکیٹ کا رخ کریں۔ اس پر ٹھیکداروں نے  اپنا سخت اعتراض جتانے لگے تو بلدیہ ممبران اور کنٹریکٹر  کے درمیان لفظی جھڑپ شروع ہوگئی  ۔ آخرکار   بلدیہ صدر نے کہاکہ ی الحال مچھلی مارکیٹ کی نیلامی کوموخرکرتے ہیں اور  23فروری کومنعقد ہونے والی میونسپالٹی کی عام میٹنگ میں نیلامی کارروائی کا معاملہ ممبران کے سامنے رکھ کر فیصلہ کرتے ہیں کہ اس تعلق سے کیا کرنا چاہئے۔

اس سے قبل سنڈے مارکیٹ، 6مٹن اسٹال، 7گوشت کی دکانوں وغیرہ کی نیلامی کی گئی۔ اس موقع پر بلدیہ کے نائب صدر کے ایم اشفاق ، اسٹانڈنگ کمیٹی  کے چیرمن قیصر محتشم، بلدیہ ممبران وینکٹیش نائک، کرشنا نند پائی سمیت کئی ممبران موجو دتھے۔