بھٹکل:22/ مارچ (ایس اؤنیوز)قانون کی خلاف ورزی کرتے ہوئے پرائیویٹ گاڑیوں کو ٹیکسی کے طور پر استعمال کرکے مسافروں کو لے جانے کی مخالفت میں  ٹیکسی ڈرائیورس و   مالکان سنگھا نے ہوناور کے آر ٹی اؤ کو گذشتہ روزمیمورنڈم سونپا تھا اور اُن پرائیویٹ سواریوں کے خلاف سخت کاروائی کرنے کا مطالبہ کیا تھا جو بھٹکل کے مسافروں کو مینگلور اور گوا ائرپورٹ سمیت دیگر جگہوں پر لے جاتے ہیں۔ مگر پہلے دئے گئے میمورنڈم پر کسی بھی طرح کی کاروائی نہ ہونے کو لے کر آج پھرٹیکسی ڈرائیوروں نے  آرٹی او سے ملاقات کی اور اپنا مطالبہ دہرایا   تو  آر ٹی او آفسر نے خود ٹیکسی اسٹائنڈ پہنچ کر جائزہ لیا۔

جیسے ہی آر ٹی او کی جیپ بھٹکل بس اسٹائنڈ کے سامنے واقع ٹیکسی اسٹائند پہنچی، تو ٹیکسی ڈرائیوروں نے  آرٹی او کی گاڑی کا گھیرائو کر لیااور  مطالبہ کیا کہ وہ پرائیویٹ کاروں پر مسافروں کو لے جانے کے سلسلے پر فوری روک لگائے  اور اُن  ڈرائیوروں اور گاڑیوں کے مالکان  کے خلاف معاملات درج کرائے۔ ڈرائیوروں نے بتایا کہ  ہم سب سرکاری قانون کے مطابق اپنی ایلّو پلیٹ سواریوں پر مسافروں کی آمد ورفت کراتے ہیں جس کے لئے ہم ٹیکس بھی ادا کرتے ہیں جب کہ ہم نے اپنی سواریوں کو خریدنے کے لئے بینکوں سے قرضہ لیا ہے جس کی ادائیگی ضروری ہے، مگر پرائیویٹ گاڑیوں پر مسافروں کی آمد و رفت کی وجہ سے لوگ ہماری ٹیکسیوں پر سوار نہیں ہورہے ہیں جس سے ہمیں پریشانی کا سامنا کرنا پڑرہا ہے ۔ ٹیکسی ڈرائیوروں نے بتایا کہ پرائیویٹ گاڑیوں پر گاڑیوں کے مالکان کو   ٹیکس بھرنے کی ضرورت نہیں پڑتی اور وہ بغیر کوئی ٹیکس بھرے مسافروں کو لے جاتے ہیں۔ خاص کر آٹو ڈرائیور وں کو 7کلومیٹر کی دوری طئے کرنے کی اجازت نہ ہونے کے باوجود وہ بھی دور دراز کے مقامات ہوناور اور بیندور کو بھی مسافروں کو لے جاتے ہیں۔ جس کے نتیجے میں ٹیکسی خرید کر ایمانداری سے جو لوگ کام کررہے ہیں ان سے ناانصافی ہورہی ہے۔

ٹیکسی ڈرائیورس  و مالکان سنگھا نے آرٹی او کو اُن سواریوں کے نمبر اور اُن کے مالک یا ڈرائیوروں کے نام مع موبائل نمبر بھی تحریری طور پر دئے ہیں اور مطالبہ کیا ہے کہ ان سبھی سواریوں پر پابندی عائد کی جائے۔ آر ٹی او آفسرایل پی نائک نے اُنہیں یقین دلایا کہ وہ پرائیویٹ گاڑیوں کو ٹیکسی کے طور پر استعمال کرنے پر سخت کاروائی کریں گے اور اُن پر پابندی عائد کریں گے، انہوں نے اس تعلق سے پولس کو بھی  ایسی پرائیویٹ گاڑیوں پر مسافروں کو لے جانے کی صورت میں اُن پر کیس فائل کرنے کی ہدایت دی ہے، جس کو دیکھتے ہوئے بعد میں ڈرائیوروں نے  گھیرائو کو ختم کیا ۔

اس موقع پرٹیکسی ڈرائیورس و مالکان اسوسی ایشن کی جانب سے  عبدالمجید، محمد آصف، عبدالرزاق، عبدالکریم، شری دھر ، منجو، گنیش، سرفراز، جگدیش، ناگراج وغیرہ موجود تھے۔