بھٹکل 9/ستمبر (ایس او نیوز) پٹرول اور ڈیزل کی قیمتوں میں روز بروز ہورہے اضافہ کو لے کر کل پیر کو کانگریس کی جانب سے بھارت بند کا جو اعلان کیا گیا ہے، بھٹکل کے سماجی ادارے مجلس اصلاح و تنظیم نے بھی اس بند کی مکمل حمایت کا اعلان کیا ہے۔
اخبار نویسوں سے گفتگو کرتے ہوئے تنظیم کے جنرل سکریٹری محی الدین الطاف کھروری نے بتایا کہ آج اتوار شام کو بلائی گئی ہنگامی میٹنگ میں اس بات کا فیصلہ کیا گیا کہ کانگریس بند کی مکمل حمایت کی جانی چاہئے ۔
الطاف کھروری نے بھٹکل کے تمام لوگوں سے اپیل کی ہے کہ وہ مہنگائی کے خلاف اپنے اداروں کو بند رکھ کر مرکزی حکومت سے اپنی ناراضگی کا اظہار کریں۔
بعد میں تنظیم کی جانب سے پریس ریلیز جاری کرتے ہوئے عوام الناس سے گذارش کی گئی ہے کہ بھارت بند کو کامیاب بنانے مکمل تعائون کریں اور اپنے اپنے کاروبار وغیرہ مکمل طور پر بند رکھیں۔ ساتھ ساتھ عوام الناس سے اس بات کی بھی درخواست کی گئی ہے کہ وہ کل پیر کو کسی طرح کی خریدوفروخت نہ کریں اور تعمیراتی مزدوروں کوبھی چھٹی دیں۔
پریس ریلیز میں تنظیم کی جانب سے کہا گیا ہے کہ مرکز میں نریندر مودی کی قیادت والی بی جے پی حکومت کے اقتدار میں پٹرول اور ڈیزل کی قیمتوں میں اضافہ نے سابقہ تمام ریکارڈ توڑ دئے ہیں اور حکومت اس پر قابو پانے میں ناکام ہے۔ اسی کے نتیجہ میں ضروریات زندگی کی تمام اشیاء کی قیمتوں میں اضافہ ہونا یقینی ہے۔ تنظیم کی طرف سے کہا گیا ہے کہ جے ڈی ایس، بائیں بازو کی جماعتیں اور کانگریس کی اتحادی پارٹیوں کے علاوہ کئی این جی اوس نے بند کی حمایت کی ہے اور تنطیم سمجھتی ہے کہ جمہوری طریقہ سے حکومت کے نامناسب فیصلوں کے خلاف ناراضگی کے اظہار کا یہی ایک طریقہ ہے۔