بھٹکل:27/ستمبر (ایس اؤنیوز)بھٹکل کا سماجی ادارہ مجلس اصلاح و تنظیم کے ایک وفد نے آج بدھ کو  میونسپالٹی دکانوں  کی تحویلی کارروائی کے دوران دل برداشتہ ہوکر خود سوزی کے ذریعے خود کشی کرنے والے  رام چندرنائک کے گھرپہنچ کر والدہ اور بھائی سمیت دیگر  گھروالوں سے ملاقات کی اور نوجوان کی موت پر گہرے دکھ کا اظہار کیا۔ 

تنظیم کے صدر محمد مزمل قاضیا نے گھروالوں سے بات کرتے ہوئے کہاکہ گھر کے ایک فرد رام چندر نائک کی ہلاکت پر تنظیم اپنے دکھ کا اظہار کرتی ہے اور تنظیم ہمیشہ سے بلدیہ دکانداروں کے ساتھ ہے ، تنظیم اپنے اثر و رسوخ کو استعمال کرتے ہوئے سرکاری سطح پر دکانوں کو اصل دکانداروں کے حوالے کئے جانے کے تعلق سے جو کچھ بھی رکاوٹیں ہیں انہیں دور کرنے کی کوشش کرے گی۔ تنظیم کی طرف سے بہت پہلے ہی کہا جاچکاہے کہ بلدیہ دکانوں کی نیلامی نہ کی جائے۔ لیکن  ضلع ڈپٹی کمشنر کے حکم سے دکانوں کی نیلامی ہوئی ہے جس کی وجہ سے غریب دکانداروں کو تکالیف کا سامنا کرنا پڑا ہے۔ اس موقع پر انہوں نے تنظیم کی طرف سے مہلوک کے خاندان کو 25،000روپئے کامالی تعاون پیش کیا ۔

وفد میں جنرل سکریٹری محی الدین الطاف کھروری ، نائب صدر عنایت اللہ شاہ بندری ، ڈی ایف صدیق، صدیق میراں ، ابوالقاسم ایس ایم، میونسپل کونسلر وینکٹیش نائک وغیرہ موجود تھے۔