بھٹکل سرکاری اسپتال کے حالات ابتر :مسائل کو سننے والا کوئی نہیں :تعلقہ پنچایت میٹنگ میں میڈیکل افسر نے ہی پیش کئے مسائل
بھٹکل:24/مئی (ایس اؤنیوز)بھٹکل تعلقہ اسپتال میں عملے کی قلت ہے ، تمام میٹنگوں میں موضوعات پر بحث ہوتی ہے لیکن حل کسی صورت میں نظر نہیں آرہا ہے، یہ بات تعلقہ میڈیکل آفیسر ڈاکٹر منجوناتھ شٹی نے بدھ کو منعقدہ تعلقہ پنچایت میٹنگ میں کہی۔
میٹنگ کے دوران ممبران کے سوال پر وضاحت کرتے ہوئے ڈاکٹر نے کہا کہ ڈاکٹروں کو چھٹی دینے اور چھٹی دینے سے انکار کرنے کا مجھے کوئی اختیار نہیں ہے جس کی نگرانی خود ضلعی میڈیکل آفیسر کررہے ہیں، اسپتال کی ڈاکٹر سویتا کامت چھٹی پرہیں، دوسرے تعلقہ جات کے کسی انیستھسیا ڈاکٹر کو نامزد کرنے کا حکم دیا گیا ہے لیکن کوئی ڈاکٹر یہاں آنے تیار نہیں ، اسپتال میں کلرکوں کی کمی ہے ، عملے کے بغیر دفتری کاموں کو انجام دینا ممکن نہیں ہورہاہے، میں گذشتہ 6سالوں سے تعلقہ میڈیکل افسر کے عہدے سے دور ہوں، لیکن کوئی اور ڈاکٹر نہ ہونے کی وجہ سے میرے سر باندھا گیا ہے ، مجھے کوئی خصوصی اختیار نہیں ہے ، تمام ڈاکٹروں کی طرح میں بھی کام کرتاہوں، اسپتال میں پہلے جو نرسیں تھیں وہ عوام کی تکالیف کو سمجھ کر زائد وقت کام کرتی تھیں،اب میں یہاں موجود رہنے والوں کو کچھ نہیں کہہ سکتا، کام کے دوران کوئی کمی بیشی ہوتی ہے تو انہیں کوئی نوٹس بھی نہیں دے سکتا، حالات کو بہتر بنانے جاؤں تو الٹے میری حالت بگڑنے کا خدشہ کھڑا ہوجاتا ہے۔ اسپتال کے ابتر حالات پر بے اطمینانی کا اظہار کرتے ہوئے پنچایت ممبر ہنومنت نائک نے کہاکہ اسپتال میں ایم ایل اے کی صدارت میں میٹنگ ہونے کے باوجود کوئی کارروائی نہیں ہوئی ہے ، مسائل جوں کے توں باقی ہیں۔
اس کا جواب دیتے ہوئے پنچایت صدر ایشورنائک ،اسٹانڈنگ کمیٹی چیرمن وشنو دیواڑیگا اور ممبر جئے لکشمی گونڈ انے کہاکہ رکن اسمبلی اپنی بساط اور طاقت سے زیادہ کام کررہے ہیں، ہروقت مسائل کو حل کرنے کے لئے کوشاں ہیں، کئی ڈاکٹروں کو نامزد کیا گیا ہے ، مرحلہ وار بقیہ مسائل کو حل کرنے کی کوشش کی جائے گی۔ان کے مطابق اسپتال کی حالت جو پہلے تھی وہ اب نہیں ہے، انہوں نے یقین دلایا کہ یہاں ڈاکٹر نے جن مسائل کا تذکرہ کیا ہے اُن مسائل کو رکن اسمبلی کے سامنے پیش کیا جائے گا۔ کارگزار افسر وشوناتھ کوٹیان موجود تھے۔ مینجر سدھیر گاؤنکر نے استقبال کرتے ہوئے شکریہ اداکیا۔