بھٹکل:13؍نومبر (ایس او نیوز)نماز کے لئے گھر سےپیدل مسجد جارہے ایک بچے کو راستے میں آوارہ کتا کاٹ لینے سے شدید زخمی ہونے کا واقعہ بندرروڈ فرسٹ کراس پر پیش آیا ہے۔
زخمی شدہ بچے کی شناخت صہیم سہیل سونٹی (8) کی حیثیت سے کی گئی ہے۔ صہیم کے چہرے پر شدید زخم ہوئے ہیں۔
والد سہیل نے بتایا کہ بھٹکل سرکاری اسپتال میں انجکشن نہ ہونے کی وجہ سے اُسے اپنے بچے کو بیندور سرکاری اسپتال لے جانا پڑا ، جہں سے انجکشن اور ابتدائی علاج کے بعد کنداپور کے پرائیویٹ اسپتال میں داخل کرنا پڑا ہے۔
تعلقہ میں آوارہ کتوں کے حملے حدسے زیادہ ہونے پر عوام نے سخت ناراضگی اور برہمی کا اظہار کیا ہے۔آوارہ کتوں کے خوف سے عمر رسیدہ بزرگ ، عورتوں اور بچوں کو گھروں سے باہر نکلنے میں خوف محسوس ہورہا ہے۔عوام تعلقہ انتظامیہ سے مطالبہ کررہے ہیں کہ آوارہ کتوں پر لگام کسنے کے لئے آگے آئیں۔ کتوں کے بار بار حملوں کے باوجود مقامی سماجی اداروں کی خاموشی پر بھی عوام سوال اُٹھا رہے ہیں۔