بھٹکل:16طلبا ایس ایس ایل سی امتحانات سے محروم : کلاس حاضری (Attendance)میں کمی اہم وجہ
بھٹکل:23/مارچ (ایس اؤ نیوز)محکمہ تعلیمات عامہ کے اصول کے مطابق ایس ایس ایل سی امتحانات میں شریک ہونے کے لئے طلبا کو 75فی صد کلاس حاضری (Attendence) کا ہونا لازمی ہے۔ ضوابط کے تحت 75فی صد سے کم کلاس حاضری والے تعلقہ کے 16طلبا اس مرتبہ ایس ایس ایل سی امتحانات سے محروم ہوگئے۔
امتحانات سے محروم ایک طالب علم اور اس کے والدین نے ہائی اسکول صدر مدرس کے ساتھ نوک جھونک کے بعد امتحان سے محروم کرتے ہوئے بچے کی زندگی برباد کئے جانے کا الزام لگایا۔ صدر مدرس نے وضاحت کی کہ محکمہ کے ضوابط کے تحت ہم نے کارروائی کی ہے، ہمیں اس سے کوئی دشمنی نہیں ہے ، متعلم اسکول میں حاضر نہیں ہورہاتھا تو ہم نے کئی مرتبہ اس کے والدین سے اپیل کی تھی کہ بچے کو اسکول بھیجیں ۔ مگر اس وقت والدین نے ہمارا کوئی تعاون نہیں کیا تو ہمیں ضوابط کے تحت کارروائی کرنا مجبوری تھی جس کے تحت متعلم کا ہال ٹکٹ ایس ایس ایل سی بورڈ کو لوٹایا گیا ہے۔
معاملے کو لےکر بی ای اؤ ،منجی ایم آر نے ساحل آن لائن سے بات کرتے ہوئے کہاکہ تعلقہ کے 16طلبا کے ہال ٹکٹ ایس ایس ایل سی امتحانی بورڈ کوواپس کردئیے گئے ہیں۔ بورڈ کے حکم نامے پر عمل کرتےہوئے یہ کارروائی کی گئی ہے ، طلبا کو پریشان کرنا ہمارا مقصد نہیں ہے، جو بچے اسکول میں حاضری نہیں دے رہے تھے متعلقہ ہائی اسکول کے صدر مدرس اور اساتذہ نے بہتر کوشش کی ، لیکن والدین اپنے بچوں کی تعلیمی مستقبل کی طرف دھیان نہیں دینے کی وجہ سے بچوں کی کلاس حاضری میں کمی ہوئی ہے۔ اس میں کسی اسکول کے صدرمدرس کی کوئی غلطی نہیں ہونےکی بات کہی۔