ایس ایس ایل سی جوابی پرچوں کی دوبارہ جانچ کے بعد بھٹکل کے شریانک شیٹھ تعلقہ میں دوسرے رینک کے حقدار
بھٹکل:23/جون (ایس اؤنیوز)ایس ایس ایل سی کے نتائج کا اعلان کئے جانے کے بعد طلبا کی طرف سے اپنے جوابی پرچوں کی دوبارہ جانچ کا مطالبہ کئے جانے سے تعلقہ سطح پر اور ضلعی سطح پر رینکنگ میں لگاتار تبدیلیاں ہورہی ہیں۔ موصولہ اطلاعات کے مطابق تعلقہ کے شرالی چتراپور کے طالب العلم شریانک شری دھر سیٹھ نے سماجی سائنس کے پرچے کی دوبارہ جانچ کرنے کی درخواست دی تھی، جس کے بعد اُسے 4زائد مارکس حاصل ہوگئے ہیں، جس کے ساتھ ہی اس کے جملہ مارکس 620( یعنی99.2فی صد) ہوگئے ہیں۔ اس زائد مارکس کے ساتھ وہ پورے تعلقہ میں دوسرے نمبر پر پہنچ گئے ہیں، جبکہ ریاستی سطح پر بھی اُنہیں 6واں رینک حاصل ہوا ہے۔
شریانک ایک باصلاحیت طالب علم ہے ، ہائی اسکول کی سطح پر ہوئے ’’بھارت کو جانو‘‘کوئز مقابلے میں اس طالب العلم نے ریاست بھر میں دوسرا مقام حاصل کیا تھا،، مضمون نویسی میں وہ ضلع کوپہلا مقام بھی دلاچکے ہیں۔ساتھ شریانک کراٹے میں بھی چمپئین شپ جیت چکے ہیں۔ بھٹکل آنند آشرکانونٹ ہائی اسکول کے طالب علم شریانک شرالی کے استاد، مشہور کنڑا ادیب، شاعر اور پروگراموں کی نظامت میں اپنا سکہ بٹھانے والے شری دھر گنیش شیٹھ او راستانی ہیم لتا کے فرزندہیں۔ شریانک کی کارکردگی پر بی ای اؤ ، صدر مدرسہ ،اساتذہ اور دیگر تعلیمی اداروں کے ذمہ داروں نے مبارکباد پیش کی ہے۔