بھٹکل شمس اسکول کا سالانہ جلسہ : رابعہ ملیحہ ہلارے اور ندا محتشم کو ’’نجمِ اخوان ‘‘ کا گولڈ میڈل ایوارڈ
بھٹکل:23؍ڈسمبر (ایس او نیوز)شمس انگلش میڈیم اسکول کے23ڈسمبر 2018بروز اتوار سالانہ جلسے (خواتین کے لئے مختص ) میں اسکول کی ہونہار طالبات آئی سی ایس سی کے زمرے میں رابعہ ملیحہ بنت محمد مقیم عثمان ہلارے اور ریاستی نصاب کے زمرے میں ندا بنت مشتاق محتشم کو شمس کے باوقار اعزازگولڈ میڈل ’’نجمِ اخوان ‘‘ ایوارڈ سےنوازاگیا۔
خواتین کے لئے مختص سالانہ جلسے میں مہمان خصوصی کی حیثیت سے محترمہ قانتہ غنی روہیل کھنڈ یونیورسٹی بریلی ، اترپردیش اور اعزازی مہمان کے طورپر محترمہ فرح بلال رکن الدین اور نازنین بھالی شریک تھیں۔ اسکول کے سابق پرنسپال صبیحہ فاروق کوڑا نے پروگرام کی صدارت کیں۔ جلسےمیں ہونہار طالبا ت کو میرٹ ایوارڈ، کلچرل ایوارڈ، کھیل ایوارڈسے نوازتے ہوئے انہیں سند اور میمونٹو پیش کئے گئے۔
جلسے کا آغاز عائشہ سیمی کی تلاوت قرآن سے ہوا تو رابعہ ملیحہ ہلارے نے بارگاہ ایزدی میں حمد اور خدیجہ اور لبابہ نے ہدیہ نعت پیش کیں۔ نہم جماعت کی طالبات نے شمس اسکول کے ترانے کو پیش کیا۔ فاطمہ ندا نے استقبال کیا ۔ اساتذہ عفیفہ اور تحسین نے نظامت کے فرائض انجام دئیے تو خدیجہ آئینہ نے شکریہ اداکیا۔ ثقافتی پروگرام کے ساتھ شام 6بجے جلسہ اختتام کو پہونچا۔ اس موقع پر اسکول بورڈ ممبر محترمہ نبیرہ محتشم، پرنسپال فہمیدہ خضر سمیت کئی لوگ موجود تھے۔