بھٹکل:22/ جولائی(ایس او نیوز) تعلقہ کے قومی شاہراہ سے متصل شرالی کی ہادی ماستی منے مندرمیں پھر ایک بار چوری کی واردات پیش آئی ہے۔ اس بار مندرکا دروازہ توڑ کرچوراندر گھسے ہیں اورعطیہ ڈبےکو ہی لے کر فرار ہوگئے ہیں۔ چوری کی واردات جمعرات اور جمعہ کی درمیانی شب کو پیش آئی ہے، جبکہ واردات کی خبر جمعہ کی صبح منظر عام پر آئی ہے۔
موصولہ اطلاعات کے مطابق عطیہ ڈبے میں 8-10ہزارروپئے ہونے کا اندازہ لگایا گیا ہے۔ سی سی ٹی وی کیمرے میں ریکارڈ کلپ کے مطابق مندر کے بائیں جانب کا دروازہ توڑ کرچور اندر داخل ہوئےہیں، مندر میں سی سی ٹی وی کیمروں کی نصب کاری جاری رہتے چوری کی واردات کا پیش آنا کئی شبہات کو جنم دے رہا ہے۔
خبر ملتے ہی ایڈیشنل ایس پی دیوراج ، ایس آئی منجپا اپنے عملے کے ساتھ مندر پہنچ گئے اور لوگوں سے معلومات حاصل کرتے ہوئے مندر کا معائنہ کیا۔ بعد میں ملزموں کا سراغ لگانے کے لئے جاسوسی کتوں کو لانے کی بات کہی ۔ اس سلسلے میں موہن مادیو دیواڑیگا نیر کنٹھ نے پولس تھانہ میں چوری کے تعلق سےشکایت درج کیہے اوربھٹکل دیہی پولس تھانے میں کیس درج کرلیا گیا ہے۔
خیال رہے کہ گذشتہ 29اپریل کو بھی اسی مندر کا دروازہ توڑ کر مورتیوں سمیت 5لاکھ روپئے سے زائد قیمت والے زیورات کو چوروں نے لوٹ لیا تھا۔