مسقط میں بھٹکل کے ایک مکین کی خودکشی؛ دوپہر تک نعش ملنے کی توقع
بھٹکل:14/اکتوبر(ایس اؤ نیوز) عمان کے مسقط میں بھٹکل کے ایک شخص کی نعش ایک عمارت کی خالی جگہ پر لٹکتی ہوئی پائی گئی، جس کے تعلق سے بتایا گیا ہے کہ اُس نے خودکشی کی ہے۔ یہ واردات 13 اکتوبر کو پیش آئی۔
مسقط سے ایک ذرائع نے بتایا کہ مہلوک شخص کی شناخت محمد اسماعیل شرالی (40) کی حیثیت سے کی گئی ہے جو بھٹکل کے گڈلک علاقہ کا رہنے والا تھا۔
ذرائع نے بتایا کہ اسماعیل مسقط کے سِیب علاقہ میں اپنے بھائی کی گھڑی کی دکان میں ملازمت کرتا تھا اور گذشتہ چھ سالوں سے مسقط میں ہی برسرروزگار تھا، ہمیشہ کی طرح وہ سنیچر کو صبح دکان کھولا تھا، مگر ایک گھنٹہ بعد وہ گھر جانے کے لئے نکلا، بتایا گیا ہے کہ قریبی سوپر مارکٹ سے اُس نے ایک رسی خریدی تھی۔ کچھ دیر بعد اس بات کی خبر ملی کہ اُس کی نعش عمارت کے ایک خالی جگہ پر چھت سے لٹک رہی ہے۔
اطلاع ملتے ہی مسقط پولس موقع پر پہنچی اور نعش کو اپنی تحویل میں لیا۔
جیسے ہی بھٹکل میں واقعے کی خبر پہنچی، گڈلک روڈ پر واقع ان کے مکان پر کافی لوگ تعزیت کے لئے پہنچ گئے۔ خودکشی کی وجہ معلوم نہیں ہوسکی ہے۔
گھر والوں نے بتایا کہ کچھ ماہ قبل ہی اُس کی اہلیہ مسقط سے واپس لوٹی تھی، اُس کو ایک تین سال کی بچی بھی ہے۔
اُدھر مسقط میں بھٹکل مسلم جماعت کی جانب سے فوزان محتشم نعش کو حاصل کرنے کے لئے کاغذی کاروائیوں میں مصروف ہیں۔ ساحل آن لائن سے گفتگو کرتے ہوئے فوزان نے بتایا کہ آج اتوار دوپہر تک نعش ملنے کے اُمید ہے، جس کے بعد مسقط میں ہی تدفین عمل میں آئے گی۔