بھٹکل:21/جنوری (ایس او نیوز) بھٹکل کا اربن بینک کسی بھی نیشنل بینک سے کم نہیں ہے، بھٹکل اربن کو آپریٹیو بینک جس طرح اپنے گاہکوں کو سہولیات فراہم کرتا ہے وہی اس کو عالمی سطح پر متعارف کرنے کا اہم سبب ہے۔ ان باتوں کا خیال رکن اسمبلی منکال وئیدیا نےظاہر کیا۔ وہ یہاں سنیچر کی شام بینک عمارت کی تجدید کاری کے بعد نئے روپ میں تعمیر کردہ بینک کی عمارت کا افتتاح کرنے کے بعد خطاب کررہے تھے۔ انہوں نے کہا کہ اربن بینک گذشتہ پانچ دہوں سے مقامی عوام کو سہولیات فراہم کررہا ہے، فی الحال ریاست میں یہ بینک گریڈ -1کی فہرست میں شامل ہے۔ بینک کی ترقی میں بینک عملے کی مشقت و محنت چھپی ہے، منکال وئیدیا نے کہا کہ بینک گاہکوں کا ہے ، انتظامیہ کی جائیداد نہیں ہے ، عوام سے منتخب شدہ افراد ہی یہاں کے انتظامات کی نگرانی کرتے ہیں، بینک معاملات میں بے کاراور بے تکی افواہیں ، پیچیدگی پھیلا کر اس کو بدنام کرنا اچھی بات نہیں ہے، تمام کو چاہئے کہ وہ متحدہوکر بینک کو مضبوط کریں۔
افتتاحی تقریب میں انفراسافٹ ٹکنالوجی لمیٹیڈ کے صدر منیندر سنگھ نےخطاب کرتے ہوئے کہاکہ بینک کے ذریعے ’’روپے کارڈ‘‘ کا اجراء ہونا ایک سنگ میل کی حیثیت رکھتاہے۔ ہیانگو آئس کریم کے مینجنگ ڈائرکٹر پردیپ پائی نے کہاکہ عوامی میدان میں رکاوٹوں کا ہونا فطری بات ہے ، انہوں نے الزامات سے مایوس ہوئے بغیر ترقی کو تیز کرنے کی صلاح دی ۔ بلدیہ صدر محمد صادق مٹا ، کنڑا ادیب ڈاکٹر ضمیر اللہ شریف ، منگلورو ایکسس بینک کے علاقائی مینجر بی، سریش ، بھٹکل اربن بینک کے صدر عبدالمجید چوگلے ، نائب صدر شیخ قادر باشاہ ڈائس پر موجود تھے۔ منوہر پربھو نے آئی ایس اؤ کے ذریعے بینک کی تصدیق پر خوشی کا اظہار کیا۔ بینک کے جنرل مینجر عبدالرزاق نے استقبال کرتے ہوئے افتتاحی کلمات پیش کئے ۔ معاون جنرل مینجر سبھاش شٹی نے شکریہ اداکیا۔ بینک آفیسر ودیا بھٹ اور ریکھا کامت نے پروگرام کی نظامت کی ۔ اوما گوڑیگار نے کنڑا زبان پر گیت پیش کیا۔