بھٹکل:بلدیہ یومیہ اورعارضی مزدوروں کو مستقل کرنے کا مطالبہ :سنگھ نے حکومت کو میمورنڈم دیا
بھٹکل:12/جون (ایس اؤنیوز)ریاست کے بلدیہ مزدور، ڈرائیوروغیرہ مختلف شعبہ جات کے تحت کام کرنے والے عارضی اور یومیہ مزدوروں پر ہورہے استحصال سے نجات دلا کر انہیں مقامی انتظامیہ اداروں کی طر ف سے تنخواہ ادا کرنے کی مانگ لے کر سی آئی ٹی یو کرناٹکا میونسپل مزدور سنگھ بھٹکل نے بھٹکل اسسٹنٹ کمشنر کے ذریعے ریاستی حکومت کو میمورنڈم سونپا۔
ریاستی حکومت نے انتخابات سے پہلے جو وعدہ کیا تھا اس کو اب تک پورا نہیں کیا ہے۔ اپنے پہلے بجٹ میں 2017مارچ 30کے اندر مزدوروں کو مستقل کرنے کی پیش کش کی گئی تھی جو اب تک فائل کی دھول چاٹ رہی ہے، میونسپل مزدوروں کی تنخواہوں میں ترمیم کرنے کے لئے جو حکم جاری کیا گیا تھا کئی ایک مقامی اداروں نے اس کو اب تک جاری نہیں کیا ہے ۔ سرکار اور بلدیہ کی طرف سے ٹھیکداروں کی طرف سے تنخواہیں ادا کی جاتی ہیں۔ لیکن یہاں ٹھیکدار تعین کردہ تنخواہیں ادا نہ کرتے ہوئے مزدوروں کااستحصال کررہے ہیں۔ اترکنڑا ضلع میں گھر گھر کچرا جمع کرنے والے مزدوراور ڈرائیور تنخواہ مانگی تو انہیں کام سے ہی نکال باہر کیا گیا ہے۔ حالات کو دیکھتے ہوئے حکومت فوری اقدامات کرے اور یومیہ اور عارضی طریقہ کار کو ختم کرنے کامطالبہ میمورنڈم میں کیا گیا ہے۔ اس موقع پر سی آئی ٹی یو کے ضلع سکریٹری سبھاش کوپی کر، سبھاش شٹی ، بھٹکل میونسپل مزدور سنگھ کے صدر راج کمار ، ناکراج کرشنا وغیرہ موجود تھے۔