کیرلا میں چاند دیکھے جانے کے بعد کیرالہ سمیت مینگلور، اُڈپی اور بھٹکل قاضی صاحبان کی طرف سے رمضان کا اعلان؛ سنیچر کو ہوگا پہلا روزہ
بھٹکل:26/مئی (ایس اؤنیوز) پڑوسی ریاست کیرالہ میں کالیکٹ کے قریب کاپاڑ میں رمضان المبارک کا چاند نظر آنے کے بعد اور کیرالہ قاضی کی طرف سے چاند کی رویت ثابت ہونے کے بعد پڑوسی علاقہ مینگلوراور اُڈپی سے لے کر بھٹکل تک متعلقہ علاقوں کے قاضی صاحبان نے رمضان کا اعلان کردیا ہے، جس کے ساتھ ہی کل سنیچر کو ان تمام علاقوں میں پہلا روزہ ہوگا۔
بھٹکل میں دونوں جماعتوں کے قاضی صاحبان نے چاند دیکھے جانے کی تصدیق کرتے ہوئے سب کو رمضان کی مبارکباد پیش کی ۔اُدھر خلیجی ممالک میں آج 30 شعبان ہونے کی بناء پر کل سنیچر کو رمضان کا اعلان کیا جاچکا ہے، اس طرح سعودی عرب اور دبئی سمیت خلیجی ممالک میں بھی سنیچر کو یکم رمضان ہے۔
بھٹکل میں رمضان کا اعلان ہوتے ہی عشاء کی اذان کے فوری بعد اکثر مسلمانوں نے اپنی دکانیں بند کرنی شروع کردی اور تراویح کی تیاریوں میں جٹ گئے، جبکہ حسب معمول بھٹکل کی تمام مساجد میں حفاظ کرام کی امامت میں مسلمانوں نے تراویح کی نماز ادا کی۔ رمضان المبارک کی آمد کے ساتھ ہی عشاء میں نمازیوں کی تعداد میں بے پناہ اضافہ دیکھا گیا، جبکہ تمام مساجد میں کثیر تعداد میں مسلمانوں نے پورے اہتمام کے ساتھ تراویح کی نماز ادا کیں۔
خیال رہے کہ بھٹکل میں دو دن کے بے موسم برسات کے بعد آسمانوں پر بادل چھائے نظر آتے ہیں، البتہ بارش نہ ہونے سے لوگوں کا گرمی سے برا حال ہے۔
بھٹکل میں پہلے روزے کی ختم سحری کا وقت 4:34 ہے جبکہ افطاری 6:57 کو ہوگی۔ یعنی یہاں کا روزہ 14 گھنٹے 23 منٹ کا ہوگا۔