بھٹکل:29/ اگست (ایس اؤ نیوز)تعلقہ کے دیہی علاقوں کے طلبا اپنے اسکول اور کالجوں کو پہنچنے اور لوٹنے کے لئے مناسب بسوں کی سہولت نہیں ہونے کی وجہ سے پریشان ہونے کا الزام عائد کرتے ہوئے انہیں آنے جانے کے لئے بسوں کا بہتر انتظام کرنے کا مطالبہ لے کر بھٹکل بس ڈپو مینجر کو میمورنڈم سونپاگیا۔
اے بی وی پی بھٹکل کی طرف سے دئیے گئے میمورنڈم میں کہاگیا ہے کہ تعلقہ کے مختلف دیہات اور پڑوسی تعلقہ جات سے کئی طلبا و طالبات تعلیم حاصل کرنے کے لئے بھٹکل آتے ہیں۔ لیکن انہیں وقت پر بس کی سہولت میسر نہیں ہے۔ ہوناور اور بھٹکل کے درمیان چلنے والی بسوں کی تعداد میں بھی کٹوتی کی گئی ہے ۔ اترکوپا سے آنے والی بسوں کی اوقات میں کمی بیشی کی گئی ہے۔ ان حالات سے طلبا کو کافی نقصان پہنچ رہاہے۔ طلبا کی بہتری کے لئے مناسب اقداما ت اٹھانے کے لئے میمورنڈم میں مانگ کی گئی ہے۔ اس موقع پر پررندر، وشوناتھ، راگھو، دیواکر، سندھیا، سروجا، ریشما، نویا، لاونیاو غیرہ موجود تھے۔ ڈپو مینجر وائی کے باناولیکر نے میمورنڈم وصول کیا۔