بھٹکل 25/اکتوبر (ایس او نیوز)بھٹکل تعلقہ ورکنگ جرنلسٹ ایسو سی ایشن کے قیام کو 2017میں پچیس سال مکمل ہورہے ہیں۔ اس حوالے سے ایسویسی ایشن کی سلور جوبلی منانے کا فیصلہ کیا گیا ہے۔
مسٹر رادھا کرشنا بھٹ صدر بھٹکل تعلقہ ورکنگ جرنلسٹ ایسو سی ایشن نے جنرل باڈی میٹنگ کی صدارت کرتے ہوئے بتایا کہ جنوری 1993 میں اس تنظیم کا قیام عمل میں آیا تھا۔ اس طرح ایسو سی ایشن کامیابی کے ساتھ اپنے 24سال مکمل کرکے 25ویں سال میں داخل ہورہی ہے۔ اس کی یاد گار کے طورپر سلور جوبلی منانے کا فیصلہ کیا گیا ہے۔ اس کا شاندارافتتاح جنوری 2017میں ہوگاجس میں خوبصورت کلچرل پروگرام کا اہتمام کیا جائے گا۔ پھر سال بھرمیں مختلف سماجی و ثقافتی پروگرام منعقد کیے جائیں گے اور جنوری 2018میں سلور جوبلی تقاریب کا اختتامی پروگرام منعقد کیا جائے گا۔جس میں مشہور ادیبوں اور دانشوروں کو مدعو کیا جائے گا۔
مسٹر بھٹ نے مزید تفصیل بتاتے ہوئے کہا کہ سلور جوبلی تقاریب سے متعلقہ مختلف پروگرام ترتیب دینے کے لئے سماج کے معزز حضرات پر مشتمل کمیٹیاں تشکیل دی جائیں گی۔ ایسو سی ایشن کی جانب سے سلور جوبلی کی یادگار کے طور پر کسی ایک گاؤں کو گود لے کر اس کی اہم بنیادی ضروریات،تعلیم، صحت عامہ وغیرہ کے ضمن میں ترقی کے لئے تعاون کرنے کی تجویز بھی زیر غور ہے۔اس موقع پر ایک شاندار یادگار مجلہ (سوینئر) بھی شائع کیا جائے گا جس میں مختلف موضوعات پر مضامین کے علاوہ بھٹکل تعلقہ سے متعلق تصاویر، یہاں کی عام زندگی سے متعلق معلومات وغیرہ کنڑا اور اردو زبان میں شامل کی جائیں گی۔
سلور جوبلی کی مناسبت سے ایسو سی ایشن کی طرف سے 25 نامور شخصیات کی عزت افزائی کی جائے گی جن میں سینئر صحافی اور سماج کی قابل قدر ہستیاں شامل ہونگی۔صحافیوں کی خدمات کے اعتراف کے طور پرایوارڈ دیا جائے گا جو سماج کی مشہور شخصیات کے نا م پر قائم ہوگا۔یہ ایوارڈ سلور جوبلی سال سے ہی شروع کرنے کی تجویز پر غور کیا جارہا ہے۔
اس میٹنگ میں ایسوسی ایشن کے سابق صدر اور ضلع کمیٹی کے رکن راگھویندرا ہیبار، جنرل سکریٹری بھاسکر نائک، سینئر نائب صدر محمد رضا مانوی، ضلع انتظامیہ کمیٹی کے رکن فیاض ملا، بھوانی شنکرنائک، انصار عزیزندوی، سید احمد سالک، پرسنا بھٹ، راگھویندرا ملیاوغیرہ موجود تھے۔