بھٹکل : ریلوے کے ذریعے رقم سپلائی کرنےو الے نوجوان سے پولس کی پوچھ تاچھ
بھٹکل :18/اکتوبر(ایس او نیوز)دہلی سے ایرناکولم کی طرف 23لاکھ روپئے لے جانے کے دوران ایک نوجوان کو بھٹکل ریلوے پولس نے رقم سمیت اپنی تحویل میں لے کر پوچھ تاچھ کے لئے بھٹکل ٹائون پولس کو سونپنے کا واقعہ منگل کی شام پیش آیا ہے۔ تحویل میں لینے والے ملزم کی شناخت سانگلی کے رہنے والے روہت کی حیثیت سے کی گئی ہے۔ سوشیل میڈیا سے ملی اطلاع کے مطابق یہ شخص دہلی سے ایرناکولم جارہا تھا، بغیر کوئی داخلے کے اتنی بڑی رقم اپنے ساتھ لے جانے کے تعلق سے دریافت کرنے پراطمینان بخش جواب نہ ملنے پر پولس نے مشکوک حالت میں اسے بھٹکل ریلوے اسٹیشن پرگرفتارکرلیا ہے۔ البتہ ایک دیگر ذرائع سے بتایا گیا ہے کہ یہ شخص کاروار سے مینگلور جارہا تھا اور اس شخص کا تعلق کاروار سے ہے۔
ابھی تک یہ پتہ نہیں چلاہے کہ رقم کس کی ہے۔ رقم کے متعلق پولس نے ضروری دستاویزات طلب کئے ہیں۔ البتہ بتایا گیا ہے کہ اس سلسلے میں نوجوان کے ذمہ داروں نے بدھ تک متعلقہ رقم کے دستاویزات پولس کو سونپنے کا یقین دلایا ہے۔ بھٹکل شہری پولس تھانہ ایس آئی کوڈگونٹی کی قیادت میں جانچ جاری ہے۔