شاہراہ کنارے باکڑا دکانوں کو ہٹانے بھٹکل محکمہ پولس نے میونسپالٹی کو لکھا خط
بھٹکل:4؍ڈسمبر (ایس او نیوز)قومی شاہراہ (این ایچ 66) کے کناروں پر باکڑا دکانوں کی وجہ سے شاہراہ پر حد سے زیادہ سواریوں کی گنجانی ہونے سے حادثات میں اضافہ ہورہاہے، اس پر پابندی لگانے کے لئے شاہراہ کناروں پر عارضی شیڈ تعمیر کرکے بیوپار کرنے والے باکڑا دکانداروں کو نکال باہر کرنے کے لئے محکمہ پولس نے بھٹکل میونسپالٹی کو خط لکھا ہے۔
خط میں کہا گیا ہے کہ بھٹکل کے پورورگا گنیش نگر سے تنگنگنڈی کراس تک دن بدن باکڑا دکانوں میں اضافہ ہورہاہے، سینکڑوں گاہک اپنی سواریوں کےساتھ شاہراہ کنارے کھڑے رہ کر حادثات کو دعوت دے رہے ہیں۔ اس کے علاو ہ باکڑا بیوپاریوں کی وجہ سے شاہراہ سے جڑے معاون راستوں سے چلنے والی سواریوں کو سامنے سے آنے والی سواریوں کا پتہ نہیں چل پانے سے بھی حادثے ہورہے ہیں۔ ان وجوہات کی بنا پر این ایچ 66کے دونوں کناروں پر موجود دکانوں ، باکڑا بیوپاریوں کو نکال باہر کرنےکے لئے کہا گیا ہے۔
دکانداروں سے اپیل : پولس محکمہ کی جانب سے خط موصول ہوتے ہی بلدیہ صدر محمد صادق مٹا نے بلدیہ افسران کے ساتھ متعلقہ شاہراہ کناروں کا دورہ کرتے ہوئے باکڑا بیوپاریوں کو شاہراہ سے دور رہنے کی اپیل کی۔ کچھ دکاندار شاہراہ سے بالکل متصل بیوپار کررہے ہیں ایسی جگہوں کی شاہراہ پر لوگوں کا ہجوم ہونے سے ٹرافک کے لئے کافی دقت ہورہی ہے۔ انہوں نے دکانداروں سے کہا کہ ہم کسی غلط مقصد سے یہ کام نہیں کررہے ہیں اس لئے دکاندار تعاون کریں۔ بلدیہ چیف آفیسر ڈی دیوراج، سنئیر صحت عامہ افسر سوجیا سومن وغیرہ موجود تھے۔