بھٹکل:29/ جولائی(ایس او نیوز)تعلقہ کے ماوین کوروے گرام پنچایت حدودکے کریکال میں جمعہ کی سہ پہر جب فاریسٹ عملہ علاقہ کی  زیر تعمیر عمارت کو منہدم کرنے پہنچاتو مقامی لوگوں نے سخت مخالفت کی اور آفسران کوآڑے ہاتھوں لیا۔ عوام کی مخالفت کو دیکھتے ہوئے بالاخرمحکمہ جنگلات کے آفسران کوخالی ہاتھ واپس لوٹنا پڑا۔

زیر تعمیر عمارت کے متعلق بتایا جارہاہے کہ وہ فوریسٹ زمین پر تعمیر کی جارہی ہے، قانونی کارروائی کے لئے فوریسٹ عملہ آگے بڑھاتو مقامی لوگوں نے کہاکہ ہم یہاں گذشتہ 50سال سے رہ رہے ہیں، 1972میں ہی اس وقت کے تحصیلدار نے ہمیں زمین کی سند دی ہے۔ اس سلسلے میں ناگما ایریا موگیر نے اپنی پریشانی کا ذکر کرتے ہوئے کہاکہ اب جب کہ ہمارا گھر بوسیدہ ہوگیا  ہے گرنے کے قریب ہے تو مجبوری میں ہم اپنے مکان کونئے سرے سے تعمیر کررہے ہیں، لیکن فوریسٹ عملہ ہمیں بے کار میں پریشان کررہاہے، ناگما نے بتایا کہ انہوں نےزمین کے دستاویزات آفسران کو دکھائے ہیں مگرآفسران کہہ رہے ہیں کہ اس کی کوئی حیثیت نہیں ہے، اب ہم جائیں بھی تو کہاں جائیں؟ مقامی لوگوں نے فوریسٹ عملہ پر الزام لگایا کہ تعلقہ میں فوریسٹزمین کو اتی کرم کرتےہوئے کئی عمارتیں کھڑی ہیں مگر فوریسٹ عملہ ان عمارتوں کے متعلق بالکل خاموش ہے، اورہم جیسے مجبوروں اور لاچاروں پراپنا حق چلا نے کی کوشش کرتے ہیں، ناگما نے بتایا کہ فوریسٹ عملے کی کارروائی سے ہمارا ہزاروں روپیوں کا نقصان ہواہے، ہم نے یہ معاملہ اب اعلیٰ افسران کے ٹیبل پر پہنچایا ہے اور انصاف کرنے کے لئے کہا ہے۔

رکن اسمبلی کا دورہ : رکن اسمبلی منکال وئیدیا ، ضلع پنچایت صدر جئے شری موگیر ، تعلقہ پنچایت نائب صدر رادھا اشوک وئیدیا نے جائے وقوع پر پہنچ کر لوگوں سےملاقات کرتے ہوئے جائزہ لیااور انہیں یقین دلایا کہ انسانی بنیادوں پر معاملہ کو حل کرنےکی کوشش کریں گے۔