بھٹکل:23/مارچ(ایس اؤ نیوز)اترکنڑا ضلع میں فورلین تعمیر ی کام بڑی تیز رفتاری کے ساتھ جاری ہےاور کئی مقامات پر کام تکمیل کے قریب ہے، لیکن بھٹکل کے شہری حدود میں ابھی تک کام کے کوئی آثار نظر نہیں آرہے ہیں اُدھر  بھٹکل تعلقہ کے شرالی میں بھی شاہراہ کے سروے کا کام ادھورا ہے۔ مہینہ میں د و تین مرتبہ شرالی کےحدود میں سروے کرنا عام ہونے سے مکینوں ، باکڑا دکانداروں ، آٹو رکشا ڈرائیورسمیت کئی بیوپاریوں کے لئے بار بار کا سروے پریشانی کا باعث بن گیا ہے۔

عوام نے شکایت کی ہے کہ گذشتہ دو سالوں سے فورلین شاہراہ کی تعمیر کا کام جاری ہے، عوام نے نئی چمکتی شاہراہ کو دیکھنے کے لئے جو بھی تکالیف ہورہی تھیں اس کو  نظر انداز کررہے تھے، مگر اب رفتہ رفتہ یہ کام اب گلے کی ہڈی بنتا  جارہا ہے۔

 ضلع کے بقیہ تعلقہ جات میں معینہ وقت پر کام ختم ہورہاہےتو بعض مقامات پر سروے کا کام بھی نہیں ہواہے، ان میں سے ایک شرالی بھی ہے۔ عوام نے بتایا کہ ہرماہ نیشنل ہائی وے اتھارٹی کے افسران تین چار بار سروے کرتے ہیں،آخر شہری حدود میں کتنی وسعت کے ساتھ فورلین کی تعمیر ہوگی ابھی تک مقامی عوام کو پتہ نہیں چل پارہاہے، بتایا جاتا ہے کہ  کبھی 45میٹر کا سرو ے ہورہا ہے تو کبھی 30میٹر کا ۔ بتایا جارہا ہے کہ سروے کرنے والے خود انجنئیر صاحب بھی پیچیدگی کا شکار ہیں۔ اگر 30میٹر کی وسعت دے کر فورلین کی تعمیر کرتےہیں تو شہری حدود کے لئے کوئی سہولت نہیں  ہے، کیونکہ ا تنی وسعت سے سرویس روڈ، نقشہ وغیرہ نہیں ہوگا، گنجانی زیادہ ہوگی۔ اسی طرح کچھ لوگوں کا کہنا ہے کہ 45میٹر کی وسعت دے کر فورلین کی تعمیر کی جاتی ہے تو سبھی کو سہولت ہوگی۔ عوام سوال کررہے ہیں کہ کیا اتھارٹی والے صرف سروے میں ہی دن گزاریں گے یا کچھ کام بھی ہوگا۔ اسی طرح عوام کا کہنا ہے کہ اگر شہری حدود میں 30میٹر کی وسعت ہی حتمی ہوتی ہے تو شرالی کے وینکٹاپور برج سے سارداہولے برج تک فلائی اوور تعمیر کی جائے تاکہ مقامی عوام کو سہولت ہو۔ اورباربار سروے کرنے کے بجائے فوری طورپر تعمیری کام شروع کرکے مکینوں، دکانداروں اور دیگر عوام کو راحت مل سکے۔