بھٹکل:11/ستمبر (ایس اؤنیوز)بھٹکل کی سرکاری پی یوکالج ہڈین میں این ایس ایس شعبہ اور ائکو کلب کا ہیسکام کے ڈائرکٹر اور کالج ترقی بورڈ کے نائب صدر منجوناتھ نائک کروالی نےافتتاح کرنےکے بعد خطاب کرتے ہوئے کہاکہ طلبا میں سماجی خدمات کا جذبہ ہونا چاہئے۔ نظم وضبط، صبر ، برداشت ، یک جہتی ، ہم آہنگی ، مساوات طلبا کی زندگی کے لئے کافی اہمیت رکھتے ہیں، یہ تمام خصوصیات این ایس ایس سے حاصل ہونے کی بات کہی۔
مہمان خصوصی کی حیثیت سے یلووڑی کووؤر گرام پنچایت کی صدر سوشیلا ایم نائک نے خطاب کرتےہوئے کہاکہ شخصی تعمیر ، قائد انہ صلاحیت ، قومی یک جہتی ، خدمت کا جذبہ طلبا میں پیدا کرنے کے لئےاین ایس ایس ممد و معاون ہے۔ کالج ترقی بورڈ کے ممبر گنیش شیشگری ، گرام پنچایت کے نائب صدر عبدالرزاق، ممبر منجوگونڈ نے بھی موقع کی مناسبت سے خطاب کیا۔ کالج پرنسپال وسنت راؤ گاؤنکر نے صدارت کرتے ہوئے کہاکہ این ایس ایس کے ذریعے ناخواندہ اور خواندہ افراد کے درمیان رابطہ پیدا کرتے ہوئے ایک نئے سماج کی تعمیر کرنےکا اہم مقصد ہے۔ منصوبہ جات افسر منجوناتھ نائک نے افتتاحی کلمات پیش کئے۔ ممتا اور ساتھیوں نے پرارتھنا کی۔ رمانند نائک نے استقبال کیا ، لتا اور ساتھیوں نے این ایس ایس کا ترانہ پیش کیا۔ رام ناتھ نائک نے شکریہ اداکیا۔ طالبہ گیتا ٹی نائک نے نظامت کی۔