اترکنڑا اور شیموگہ اضلاع کے مختلف مقامات پر آل انڈیا مسلم پرسنل لاء بورڈ وومنس ونگ کا دورہ : معاشرے کی اصلاح میں خواتین و طالبات کا اہم کردار :ڈاکٹر آصفہ نثار
بھٹکل:6؍ڈسمبر (ایس او نیوز) معاشرے کی اصلاح میں خواتین اور طالبات کی ذمہ داریوں کے تعلق سے اُن میں بیداری پیدا کرنے کامقصد لے کر آل انڈیا مسلم پرسنل لاء بورڈ ویمنس ونگ اینڈ سوشیل ریفارم آرگنائزیشن ٹرسٹ کرناٹکا کاایک وفدکوآرڈنیٹر ڈاکٹر آصفہ نثار کی قیادت میں شیموگہ اور اترکنڑا اضلاع کے مختلف مقامات کا کیا گیا دورہ کامیاب رہا اور تمام علاقوں میں خواتین نے بڑھ چڑھ کر حصہ لیا۔
یکم ڈسمبر سے5ڈسمبر وفد نے بھٹکل ، سرسی ، مرڈیشور ، شیموگہ ، ساگر اور شکاری پور کا دورہ کیا۔ متعلقہ مقامات میں اسکولس اور کالجس کا دورہ کرتے ہوئے لکچرر حضرات اور طالبات سے ملاقات کرنے کے ساتھ ساتھ تعارفی، بیداری پروگرام اور ورکشاپ کا انعقاد کیاگیا جس میں خواتین اور طالبات کی کثیر تعداد نے شرکت فرمائی۔
بھٹکل کی جامعات الصالحات ، نیو شمس اسکول وغیرہ پر منعقد ہوئے پروگرام میں ڈاکٹر آصفہ نثار نے خصوصی خطاب کے ذریعے اصلاح معاشرے میں طالبات کے رول پر روشنی ڈالی اور معاشرے کی برائیوں کے ازالے کو لے کر خواتین وطالبات سےتبادلہ خیال کیا۔ اس موقع پر انہوں نے موبائیل ، انٹرنیٹ، سوشیل میڈیا کے غلط استعمال ، طلبا و طالبات کی بے راہ روی جیسے موضوعات پر بات کرتے ہوئے ان کی ذمہ داریوں سے آگاہ کرایا۔ خواتین وطالبات کو باور کرایا کہ دین اور دنیا الگ الگ نہیں ہیں معاشرے کی اصلاح کا واحد حل یہی ہے کہ ایمان پر مکمل قائم رہ کر نکاح کو انجام دیں، اپنے تمام مسائل کو قرآن و سنت کی روشنی میں حل کریں، اپنی زندگی میں عملی جامہ پہنائیں ، والدین اور بچوں کے درمیان عزت واحترام کا رشتہ قائم کرنے کی بات کہی۔
اس موقع پر کئی لڑکیوں نے سوالات بھی کئے جن کا ڈاکٹر آصفہ نثار نے اطمینان بخش جواب دئیے۔ اسی طرح ایک روزہ ورکشاپ بھی منعقد کیاگیا جس میں ڈیڑھ ہزار سے زائد خواتین وطالبات شریک رہیں۔شکاری پور کے مدرسہ زبیدہ للبنات ، ہائی اسکول اور پی یو کالج میں بھی پروگرام ہوا ۔ وفد میں محترمہ رحمت النساء صاحبہ کنوینر S. R. O. T شیموگہ یونٹ، محترمہ سلمہ یاسمین صاحبہ رُکن S.R.O.T شیموگہ، محترمہ عائشہ کُلثوم صاحبہ رُکُن JIH شیموگہ ،محترمہ نبیرہ صاحبہ پرنسپل الکوثر کالج بھٹکل اورمحترمہ نجمہ نازنین صاحبہ رکُن S. R. O. T بینگلور شامل تھیں ۔ بعض مقامات پر وفد کے دیگر ممبران نے بھی اپنے خیالات کا اظہار کیا۔میڈیا سے گفتگو کرتے ہوئے محترمہ ڈاکٹر آصفہ نثار نے بتایا کہ ہر جگہ تمام تنظیموں اور جماعتوں کے تعاون سے دورہ نہایت کامیاب رہا۔