بھٹکل 21/ ستمبر (ایس اونیوز)  گذشتہ جمعرات 14/ ستمبر کو بھٹکل میونسپالٹی عمارت پر پتھرائو اور توڑپھوڑ کے معاملے میں آج بھٹکل پولس نے دو مزید لوگوں کو گرفتار کرلیا ہے جن کی شناخت شنکر نائک اور دیویندرا نائک کی حیثیت سے کی گئی ہے۔

چوتنی کے رہنے والے شنکر نائک کا تعلق  شری رام سینا  سے بتایا جاتا ہے،  جبکہ منڈلی کے رہنے والے دیویندرا نائک  بھی شدت پسند تنظیم کے ممبر ہیں۔ 

بھٹکل ڈی وائی ایس پی شیو پرساد نے بتایا کہ ان دونوں کو مینگلور سے گرفتار کرکے آج بھٹکل عدالت میں پیش کیا گیا، بعد میں دونوں کو کاروار جیل بھیجا گیا ہے۔

بھٹکل ڈی وائی ایس پی کے مطابق بھٹکل میونسپالٹی عمارت پر پتھرائو اور توڑپھوڑ  سمیت پولس عملہ پر حملہ کے الزام میں گرفتارشدگان کی تعداد اب بڑھ کر 15 ہوگئی ہے اور سبھی 15 گرفتارشدگان کو کاروار ڈسٹرکٹ جیل میں رکھا گیا ہے۔