بھٹکل:24/اگست(ایس او نیوز(بھٹکل بلدیہ انتظامیہ کی ملکیت والے دوکانوں کی نیلامی کا مسئلہ دن بدن کسی نہ کسی تنازعہ کا شکار ہوکر مسائل پیدا کرتا نظر آرہاہے۔ اس سلسلے میں بھٹکل اسسٹنٹ کمشنر چدانند وٹارے نے کہا ہے کہ بلدیہ دوکانوں کی نیلامی کے متعلق وہ اترکنڑا ضلع ڈی سی سے گفتگوکریں گے اورمناسب حل ڈھونڈنے کی کوشش کریں گے۔

بدھ کو بلدیہ دوکانوں کے کرایہ داروں سے پھر ایک اپیل وصول کرنے کے بعد انہوں نے کہا کہ نیلا می کے اصول و ضوابط اور کارروائی کی تفتیش کریں گے۔ کرایہ داروں کی اپیل فوری طورپر ڈی سی کوروانہ کی جائے گی۔ اپیل میں دوکانداروں نے کہا ہے کہ نیلامی کی کارروائی سے دوکانداروں کی زندگی سڑک پر آگئی ہے،حد سے زیادہ کرایہ کی وجہ سے کئی ایک نے اپنی دوکانیں کھو دی ہیں، کچھ لوگ کرایہ اداکرنےکی حالت میں نہیں ہیں، معاملے میں کچھ خفیہ ہاتھ شامل ہیں، دوکانداروں سے انصاف کرنے کی اپیل کی گئی ہے۔ سنیل نائک، کرشنانائک آسارکیری ، گوند نائک سمیت کئی بی جے پی لیڈران اپیل سونپنے کے دوران موجود تھے ،جنہوں نے دوکانداروں کی حمایت کی۔ انگڑی کار ہت رکشھنا سمیتی کے موہن نائک، ماروتی پاؤسکر وغیرہ بھی موجود تھے۔