ریت کی سپلائی کا مستقل حل ڈھونڈ نکالنے بھٹکل رکن اسمبلی کی وزیراعلیٰ سے ملاقات؛ تعمیراتی کام ٹھپ پڑنے سے مزدوربھی پریشان
بھٹکل 25/ستمبر(ایس اؤ نیوز)منگل کی شام بنگلورو کے ودھان سبھا ہال میں وزیرا علیٰ کمار سوامی کی صدارت میں منعقدہ میٹنگ میں بھٹکل کے رکن اسمبلی سنیل نائک نے اترکنڑا، اُڈپی اور دکشن کنڑا اضلاع میں ریت سپلائی بند ہونے سے پیش آنے والے مسائل کا تذکرہ کرتے ہوئے خوشگوار طورپراس مسئلہ کو حل کرنے کے لئے ریاستی حکومت پر زور دیا۔
میٹنگ میں انہوں نے بتایا کہ گزشتہ 7-8مہینوں سے ریت سپلائی نہ ہونے کی وجہ سے ترقی جاتی کام ٹھپ پڑگئے ہیں۔ تعمیراتی کام رکے رہنے سے ہزاروں مزدوروں کا کام رُک گیا ہے جس کے نتیجے میں ان کے خاندان ، تعلیم ، صحت وغیرہ متاثر ہورہے ہیں۔ تعمیراتی کام پرمنحصر سنٹرنگ، اینٹ، لال پتھر، سیمنٹ ، لکڑی ، پینٹنگ جیسے شعبہ جات مشکلات میں پھنس گئے ہیں۔
پرائیویٹ ، سرکاری ، گرام پنچایت، تعلقہ پنچایت، ضلع پنچایت ، مقامی انتظامیہ سمیت دیگر تعمیراتی کاموں کے لئے ریت سپلائی نہ ہونے سے متعینہ کام وقت پر تکمیل نہ ہونے کی صورت میں اخراجات میں اضافہ ہونے کے امکانات ہیں، جس سے سرکاری خزانہ پر وزن پڑےگا، انہوں نے حکومت سے اس مسئلہ کو سنجیدگی سے لیتے ہوئے ریت سپلائی کا مستقل حل نکالنے کا مطالبہ کیا۔
میٹنگ میں وزیر اعلی کمار سوامی ، وزیر برائے آب پاشی ایچ ڈی ریونا، خواتین و بچہ فلاح وبہبودی وزیر جئے مالا، اُڈپی اور دکشن کنڑا کے ارکان اسمبلی ، حکومت کے چیف سکریٹری وغیر ہ موجود تھے۔
