بھٹکل میں کھلے کنوئیں میں ملی لاپتہ شخص کی نعش : خود کشی یا قتل ؟
بھٹکل:5/ستمبر(ایس اؤ نیوز) ہیبلے پنچایت حدود کے بیلی گدے فرسٹ کراس کے ایک مکان کے کھلے کنوئیں سے منگل کو ایک شخص کی نعش برآمد ہوئی ، جس کی شناخت حنیف آباد کے مکین رضوان جلیل صاب (46) کی حیثیت سے کی گئی ہے۔
بتایا جاتاہے کہ 27اگست کو اپنی بیٹی کی شادی کے تیسرے دن یعنی 30اگست کو اپنی بائک کے ذریعے گھر سے نکلا رضوان لاپتہ ہوگیا تھا۔ گھروالوں نے مقامی پولس تھانہ میں لاپتہ ہونے کی شکایت درج کرنے کے بعد اپنے طور پر بھی اس کی تلاش کررہے تھے، مگر گم شدگی کے 6دن بعد اس کی نعش ایک کنویں میں سڑی گلی حالت میں پائی گئی ہے۔ جب کے اسکی بائک بیلگدے سکینڈکراس کے عمر علی مسجد کے پاس پائی گئی ہے۔
مقامی نوجوانوں نے پولس کی مدد سے کنویں سے نعش کو باہر نکالابعد میں کاغذی کاروائی کے بعد پولس نے نعش کو سرکاری اسپتال میں پوسٹ مارٹم کے بعد گھروالوں کے حوالے کردیا۔ حنیف آباد اور مدینہ کالونی کے سماجی کارکنوں کی مدد سے نعش کو مسجد ہُدیٰ میں غسل دینے کے بعد نوائط کالونی قبرستان میں تدفین کی گئی۔
بعض لوگوں نے شبہ ظاہر کیا تھا کہ قرضدار ہونے کی وجہ سے اس نے خودکشی کی ہوگی مگر سننے میں آیا ہے کہ اس نے سبھی کا قرض اُتار دیا تھا، ایسے میں پولس چھان بین میں لگ گئی ہے کہ آخر اس کی موت کے پیچھے کیا راز ہے۔
دیہی پولس تھانہ میں کیس درج کیا گیا ہے، پولس جانچ کررہی ہے۔