بھٹکل:22/ مارچ (ایس اؤنیوز)گرام پنچایت میٹنگ میں محکمہ جات کے افسران غیر حاضر ہونے سے ناراض عوام نے گرام پنچایت اور غیر حاضر افسران کی ملامت کرتے ہوئے میٹنگ کا بائیکاٹ کئے جانے کا واقعہ تعلقہ کے ماروکیری پنچایت میں پیش آیا ہے۔

بدھ کی صبح 30-10بجے میٹنگ کا وقت طئے تھا مگر نوڈل آفیسر دیر سے تشریف لانے کی وجہ سے میٹنگ بھی دیر سے شروع ہوئی ۔ ماروکیری ایک پہاڑی علاقہ ہے، جہاں خاص کر ہیسکام،محکمہ آب پاشی اور فاریسٹ محکمہ کے افسران کی حاضری ضروری تھی ، موصولہ اطلاعات کے مطابق ان تینوں محکمہ جات کے افسران گذشتہ تین میٹنگوں سے غیر حاضر رہتے ہوئے عوامی مسائل کی طرف توجہ نہیں دینے کی وجہ سے عوام نے متعلقہ میٹنگ کا بائیکاٹ کیا۔

پنچایت کی گجانن یوتھ سنگھ نے ماروکیری میں بی ایس این ایل ٹاور کی نصب کاری کو لے کر کئی مرتبہ اپیل سونپی، پہاڑی علاقہ ہونے کی وجہ سے نیٹ ورک نہیں ملنے سے عوام رابطہ کے لئے پریشان رہتے ہیں، میٹنگ میں اس تعلق سے بات کرنا چاہیں تو متعلقہ محکمہ کے افسران میٹنگ کو آتے ہی نہیں تو کس سے بات کریں۔ پنچایت کے ذریعے گذشتہ ایک سال میں ہوئے ترقی جات کاموں کی کوئی تفصیل نہیں معلوم ، عوام اس تعلق سے کوئی سوال کرتےہیں تو پنچایت کے صدر ، ممبران اور پی ڈی اؤ کی طرف کوئی جواب نہیں ملتا، اتی کرم مسئلہ کے متعلق فاریسٹ افسران سے عورتیں کچھ پوچھنا چاہتی ہیں مگر کس سے ، افسران تو غیر حاضر رہتے ہیں۔ ایسے کئی مسائل ، حل کے انتظار میں ہیں۔ میٹنگ میں محکمہ باغبانی ، زراعت، مویشی پالن اور نوڈل آفیسر ، پنچایت نائب صدر ناگما گونڈ، پی ڈی اؤ مہیش نائک موجود تھے۔ مقامی طورپر سوم شیکھر نائک، وینکٹیش نائک، روی نائک، نندن شنیار نائک، راگھویندر نائک سمیت عوام کی کثیر تعداد شریک تھی۔