تنظیم وفد کی تحصیلدار اور اسسٹنٹ کمشنر سے ملاقات: آن لائن کے ذریعے بھی ووٹرلسٹوں میں نام درج کرواسکتے ہیں
بھٹکل:14/ نومبر (ایس اؤنیوز)مقامی تحصیلدار کے دفتر سے الیکشن کمیشن کی طرف سے 15نومبر سے جاری ہونے والے رائے دہندگان فہرست کی نظرثانی کو لےکر جو سرکلر ہواتھا، اُس کی تفصیلی جانکاری حاصل کرنے مقامی قومی سماجی ادارہ مجلس اصلاح و تنظیم کے ایک وفد نے صدر جناب ایڈوکیٹ مزمل قاضیا کے قیادت میں مقامی تحصیلدار اور اسسٹنٹ کمشنر سے ملاقات کی اور ووٹرلسٹوں میں نام داخل کئے جانے کے تعلق سے معلومات حاصل کی۔
بعد میں اخبارنویسوں سے گفتگو کرتے ہوئے جناب قاضیا مزمل نے بتایا کہ بھٹکل اسسٹنٹ کمشنر نے بتایا ہے کہ 15نومبر سے ووٹر لسٹ کی نظر ثانی کاکام شروع ہوگا۔ اس دوران 18سال کی عمر والوں کے ناموں کا اندراج ، جن کی اموات ہوئی ہے ان کے ناموں کا اخراج سمیت کئی کام انجام دئیے جائیں گے۔ خاص کر ہمارے این آر آئیز کو بھی ووٹر لسٹ میں نام درج کرنےکی سہولت فراہم کی گئی ہے۔این آر آئیز کے لئے فارم نمبر 6پُر کرنا ہے ، بھٹکل میں ان کے گھر پر جو کوئی ان کا رشتہ دار ہے اگر وہ متعلقہ فارم پُر کر پاسپورٹ نمبر دیں گے تو ان کا نام ووٹر لسٹ میں در ج ہوجائے گا۔ یہ پوچھے جانے پر اگر کوئی این آر آئیز اپنے خاندان سمیت ملک سے باہر رہتاہے تو اس کے لئے کیا صورت ہوگی تو انہوں نے بتایا کہ ایسے لوگ آن لائن کے ذریعے اپنا نام درج کرواسکتے ہیں اور آن لائن کے دوران دئیے گئے دستاویزات کی کاپیاں اپنے کسی رشتہ دار کے ہاتھوں مقامی دفتر پہنچاسکتے ہیں، ایسی کرنے کی صورت میں ان کانام بھی ووٹر لسٹ میں درج کردیا جائے گا۔ جناب مزمل صاحب نے اسسٹنٹ کمشنر کو تیقن دیا ہے کہ ووٹرلسٹوں میں ناموں کو درج کرنے یا ناموں کو درست کرنے، یا اڈرس تبدیل کرنے وغیرہ کے تمام کاموں کے لئے سرکاری عملہ کے ساتھتنظیم کے والنٹیرس بھی گھر گھر پہنچنے والے عملے کا تعاون کریں گے۔
جناب مزمل قاضیا نے بتایا کہ تنظیم وفد نے غوثیہ محلہ کے ڈرنیج مسئلے پر بھی اسسٹنٹ کمشنر سے تفصیلی گفتگو کی ہے اور مستقل حل کے لئے دباؤڈالاہے۔ جہاں تک 200کروڑ روپیوں کی منظوری کا سوال ہے، قاضیا مزمل نے بتایا کہ تنظیم اور این آر آئیز پر مشتمل ایک مشترکہ کمیٹی قائد قوم ڈاکٹر ایس ایم سید خلیل الرحمن کی قیادت میں تشکیل دی گئی تھی ۔ کمیٹی کے فیصلے کے مطابق تنظیم کے صدر سالہ جشن میں وزیر اعلیٰ سدرامیا کی موجودگی میں میمورنڈم پیش کرکے اُن سے مطالبہ کیا گیا تھا کہ ڈرنیج مسئلے کا مستقل حل نکالا جائے۔ اس وقت وزیر اعلیٰ نے ہزاروں لوگوں کے سامنے اس بات کا وعدہ کیا تھا کہ وہ اپنی میعاد میں اس مسئلہ کو حل کریں گے ۔ اس کے بعد ایس ایس سید خلیل الرحمن صاحب نے چیف منسٹر کےپرنسپل سکریٹری کے ایل عتیق سے بات چیت کی تھی ۔ بعد میں تنظیم کی دعوت پر یہاں کابینہ کے وزیر روشن بیگ نے بھٹکل کا دورہ کرتے ہوئے ڈرنیج مسئلہ کا مشاہدہ کیا تھا۔جناب مزمل قاضیا کے مطابق بھٹکل میں ڈرینیج سسٹم کی درستگی کے لئے دو سو کروڑ روپئے منظور کروانے میں جناب ایس ایم سید خلیل الرحمن صاحب اور روشن بیگ سمیت تنظیم کے تمام ذمہ داران کی کوششیں کارفرماں ہیں۔