بھٹکل :کراٹے جیسے دفاعی فن کو شہر میں متعارف اور مقبول بنانے والے کراٹے واسو انتقال کرگئے: ہزاروں طلبا سوگوار
بھٹکل:24/مئی (ایس اؤنیوز)بھٹکل تعلقہ میں کراٹے جیسے دفاعی فن کو متعارف کراتے ہوئے اس کو مقبول بنانے اور تعلقہ کے ہندو مسلم سمیت کئی لڑکے لڑکیوں کو کراٹے میں ماہربنا نے والےمنڈلی کے واسو این نائک (42) المعروف کراٹے واسو منگل کو انتقال کرگئے۔
موصولہ اطلاعات کے مطابق کراٹے واسو گذشتہ 2مہینوں سے دماغ سےمتعلق بیماری میں مبتلا تھے اور بنگلورو کے نجی اسپتال میں زیر علاج تھے، ان کے قریبی لوگوں کا کہنا ہے کہ کراٹے واسو کا حال ہی میں کامیاب آپریشن ہوا تھا اور امید کی جارہی تھی کہ وہ بہت جلد اسپتال سےگھر لوٹیں گے، لیکن بھگوان کو کچھ اور ہی منظور تھا۔ پسماندگان میں بیوی اور دوبچے ہیں۔ کراٹے واسو کے موت کی خبر سنتے ہی بھٹکل کے رکن اسمبلی منکا ل وئیدیا بنگلورو کے شنکر اسپتال پہنچ کر درشن کیا۔ بدھ کی صبح کراٹے واسو کی نعش بھٹکل لائی گئی، جہاں میت کا آخری دیدار کرنے ہزاروں لوگوں کی تعداد گھر کےباہر جمع تھی۔
میت کو آخری رسومات کے لئے لے جانے سے پہلے کراٹے واسو کے پرانے طلباء، حال ہی میں جوائنٹ والے طلبا، اُس کے استاد ودیگر کراٹے کی تعلیم حاصل کرنے والوں نے واسو کو شردھانجلی پیش کی اور واسو کی خدمات کا اعتراف کرتے ہوئے اُس کی موت پر نہایت رنج کا اظہار کیا۔
بھٹکل کے سماجی ادارہ مجلس اصلاح و تنظیم کے جنرل سکریٹری محی الدین الطاف کھروری، ضلع پنچایت صدر جئے شری موگیر، بھٹکل بلاک کانگریس صدر وٹھل نائک، تعلقہ پنچایت صدر ایشور نائک، بی جے پی مقامی صدر راجیش نائک، کانگریس لیڈران نارائن بی نائک سمیت کئی معززین نے رنج و غم کا اظہار کیا ہے۔